Ուրբաթ, 07. 10. 2022

Հայոց Բանակի Օր

Բանակի Օրուայ Առիթով Կատարուեց

Հանրապետական Մաղթանք

      Յունուարի 27-ին, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, Արմաւիրի թեմի Սուրբ Աստուածածին եկեղեցում (ք. Էջմիածին) Հայոց բանակի օրուայ կապակցութեամբ կատարուեց Հանրապետական մաղթանք:

      Սրբազան արարողութեանը ներկայ էին ՀՀ Զու բարձրագոյն սպայական կազմի ներկայացուցիչներ, Մայր Աթոռի միաբաններ եւ ՀՀ Զու Հոգեւոր Առաջնորդութեան գնդերէցներ:              

      Հոգեւոր դասը եւ արարողութեանը ներկայ զինուորականներն ու ժողովուրդը աղօթք բարձրացրեցին առ Աստուած Հայաստանի եւ Արցախի խաղաղութեան, անսասանութեան ու Հայոց բանակի յաղթական ընթացքի համար:

      Այնուհետեւ Ամենայն Հայոց Հայրապետը Հայոց բանակի օրուայ առիթով իր խօսքն ուղղեց եկեղեցում ներկայ սպաներին, զինուորներին, գնդերէցներին եւ հաւատացեալներին․ «Այսօր համախմբուել ենք Սուրբ Էջմիածնում Հայոց բանակի ստեղծման 30-ամեակի առիթով` աղօթելու մեր երկրի խաղաղութեան համար, եւ հայցելու, որ Տիրոջ օրհնութիւնը, պահպանութիւնն ու զօրակցութիւնը միշտ լինեն Հայոց բանակի հետ:

      Մեր հայրենիքի անկախութեանը յաջորդած երեք տասնամեակում մեր բանակն անցաւ հնարաւոր ու անհնարին բոլոր փորձութիւններով, անցաւ կազմաւորման դժուարին ճանապարհը: Պարտադրուած արցախեան պատերազմում փառաւոր յաղթանակներ կերտեց, նաեւ ապրեց 44-օրեայ վերջին պատերազմի արհաւիրքների դառնութիւններն ու ցաւը: Այդ իսկ պատճառով բանակի տարեդարձի ակնկալուած ուրախութիւնը չէ, որ պարուրում է մեր սրտերն այսօր, այլ սոսկալի մորմոքը մարդկային եւ տարածքային ծանր ու վշտագին կորուստների եւ դեռեւս չամոքուած կսկիծը մեր հոգելոյս նահատակների:

      Այսօր վերստին մեր հաւաքական աղօթքով Աստծոյ արքայութիւնն ենք հայցում մեր զոհուած հերոսների անմահ հոգիների համար, իսկ մեր հրամանատարներին ու զինուորներին, ովքեր քաջաբար մաքառեցին ու շարունակում են իրենց նուիրեալ ծառայութիւնը հայրենիքին, մաղթում հայկեան ոգի եւ հայկեան բազկի յաղթութիւն, ամրութիւն, կորով եւ իմաստութիւն:

      Սիրելիներ, մեր ժողովուրդը պատմութեան ընթացքում յաճախ է յայտնուել ամենատարբեր աշխարհաքաղաքական բարդ իրադրութիւններում, երբ հարկադրուած է եղել կենաց ու մահու պայքար մղելով պաշտպանել հայրենի հողն ու սրբութիւնները` անվարան վկայելով իր աստուածսիրութիւնն ու հայրենասիրութիւնը: Դարէր շարունակ «զի Աստուած ընդ մեզ է քրիստոնէական խորը համոզումը եւ «վասն հաւատոյ, վասն հայրենեաց» ոգեշունչ կարգախօսը առաջնորդող են եղել հայոց զօրականներին` ուղենշելով հայրենեաց պաշտպանների ազգանուէր սրբազան առաքելութիւնը: Այսօր եւս մեր կեանքում Աստծոյ ներկայութեան գիտակցութիւնն ու «վասն հաւատոյ եւ վասն հայրենեացէ նշանաբանը պէտք է լինեն իւրաքանչիւր բանակայինի կեանքի հաւատամքն ու հիմքը:

      Մեր բանակի կազմաւորման 30-ամեայ տարեդարձի հանգրուանը առիթ է մեր զաւակների անձնդիր ծառայութեան գնահատանքի եւ արժեւորման, առիթ է նաեւ ինքնաքննութեան, գործուած սխալներին եւ թերացումներին լուրջ անդրադարձի, որպէսզի ի զօրու լինենք դիմակայելու մեր երկրի առջեւ ծառացած մարտահրաւէրներին եւ լաւատեսութեամբ մեր հայեացքը ուղղելու դէպի ապագայ: Պարտութիւններն անդառնալի եւ վէրքերն անբուժելի են մնում, եթէ մեզանում ուժ չենք գտնում վերյառնումի ու արարման, եթէ գլուխ է բարձրացնում մեղաւորներ փնտռելու ու պարտութիւնը իբրեւ անխուսափելիութիւն ներկայացնելու մոլուցքը, եթէ հաւատքը չի բխում անկեղծ սրտից ու մաքուր մտքից, որ կարող է Աստծուն մասնակից դարձնել հայրենիքը շէնացնելու եւ հզօրացնելու առաքելութեանը: Երբ հաւատարիմ ենք գտնուել մեր առաքելութեանը, մեր հայրենին ծաղկել է, սահմաններն անառիկ են մնացել, երբ անհաւատարմութեան, անարդարութեան որոմ է խառնուել մեր արդար ցորեանին, պարտուել ենք, նահանջ ապրել եւ երկիր կորցրել: Երբեք չմոռանանք առաքեալի խօսքը` «Եթէ Աստուած մեր կողմն է, ո՞վ կը լինի մեզ հակառակ» (Հռ. 8.31):

      Սիրելիներ, Հայաստանի եւ Արցախի շուրջ ստեղծուած իրավիճակով պայմանաւորուած` հրամայական է ժամանակների պահանջներին համարժէք Հայոց բանակի հզօրացումը, որին պիտի նուիրուենք մեր ամէն կարելիութեամբ: Մեր բանակի սրբազան առաքելութիւնը պիտի շարունակի մնալ մեր ժողովրդի ազգային ինքնութեան եւ ազատ ու անկախ կեանքի պաշտպանութիւնը մեր պատմական, հարազատ բնօրրանում, որտեղ մեր նախնիք իրենց հաւատքի եւ հայրենասիրութեան անջնջելի հետքն են թողել: Հայոց Եկեղեցին եւ եկեղեցականը զօրաւիգ են Հայոց բանակին, ձեզ, սիրելիներ, հայրենիքի խաղաղութեան ու ապահովութեան, մեր արդար իրաւունքների պաշտպանութեան կենսական յանձնառութեան մէջ: «Թշնամին թող չասի, թէ յաղթեցի, կամ հալածիչներս ցնծան, եթէ սասանուեմ» (Սաղմ. 12.5)։

       Մեր բոլորի հայրենանուէր ծառայութեամբ պիտի բացառենք մեր հասցէին արտաբերումը սաղմոսասացի այս խօսքերի: Հաւատում ենք, որ փորձութիւններին պիտի դիմագրաւենք ազգային միասնութեամբ եւ մեր կեանքը պիտի պայծառացնենք նոր յաղթութիւններով ու հայրենաշէն ձեռքբերումներով:

      Վերստին Հայրապետական Մեր սերն ու օրհնութիւնը բերելով ամէնքիդ Հայոց բանակի 30-ամեակի առիթով` ի խորոց սրտի հայց ենք բարձրացնում առ Աստուած հայրենիքի պաշտպանութեան դիրքերում իրենց կեանքն ընծայած մեր զաւակների համար: Աղօթում ենք Հայոց բանակի հրամանատարական կազմի ու զինուորների ապահով ու անփորձանք ծառայութեան, յաղթանակների եւ հայրենի եզերքների խաղաղութեան ու անսասանութեան համար: Թող Տիրոջ ողորմութիւնը, խնամքը եւ Սուրբ Աջի հովանին լինեն հայոց բանակի, մեր հայրենիքի, համայն աշխարհասփիւռ մեր ժողովրդի հետ, այսօր եւ միշտ. ամեն»:

      Հանրապետական մաղթանքից յետոյ Գէորգեան հոգեւոր ճեմարանի հանդիսութիւնների դահլիճում տեղի ունեցաւ պաշտօնական ընդունելութիւն, որի ընթացքում կատարուեց պարգեւաբաշխութիւն:

      Ի գնահատութիւն Հայրենիքին մատուցած ծառայութիւնների, Ամենայն Հայոց Կաթողիկոսը, ընդառաջ ՀՀ Զու Հոգեւոր Առաջնորդութեան միջնորդութեանը, Հայոց Եկեղեցու «Սուրբ Ներսէս Շնորհալի» պատուոյ բարձր շքանշանի արժանացրեց ՀՀ ՊՆ եւ ԱՀ ՊԲ մի շարք զինուորականների` գնդապետներ Կարեն Ջալաւեանին, Արթուր Պօղոսեանին, Նորայր Մկրտչեանին, Գագիկ Ասլանեանին, Արեն Սարգսեանին եւ Էրիկ Գրիգորեանին: Նորին Սրբութիւնը «Սուրբ Ներսէս Շնորհալի» շքանշան յանձնեց նաեւ ՀՀ ՊՆ տեղակալ Արման Սարգսեանին եւ ՀՀ պաշտպանութեան նախարարութեան գլխաւոր քարտուղարի տեղակալ Տիգրան Ղարիբեանին: 

      Ընդունելութեան ժամանակ ՀՀ Պաշտպանութեան նախարարի հրամանով զինծառայողների հոգեւոր եւ հայրենասիրական դաստիարակութեան գործում զգալի աւանդի համար մի շարք եկեղեցականներ արժանացան նախարարութեան պարգեւների:

      «Մարշալ Բաղրամեան» մեդալ շնորհուեց ՀՀ Զու Հոգեւոր առաջնորդ Հոգեշնորհ Տ․ Մովսէս վարդապետ Սարգսեանին:

      «Անդրանիկ Օզանեան» մեդալով պարգեւատրուեցին Քրէակատարողական հիմնարկների հոգեւոր տեսուչ Հոգեշնորհ Տ․ Ռուբէն վարդապետ Զարգարեանը, Սուրբ Շողակաթ վանքի վանահայր Հոգեշնորհ Տ․ Արիս աբեղայ Տօնոյեանը, աւագ գնդերէց Արժանապատիւ Տ․ Պսակ քահանայ Մկրտչեանը,  գնդերէցներ Արժանապատիւ Տ․ Մանուկ քահանայ Զեյնալեանը եւ Տ․ Տրդատ քահանայ Գէորգեանը: «Դրաստամատ Կանաեան» մեդալ շնորհուեց գնդերէցներ Գագիկ սարկաւագ Յակոբեանին, Մինաս սարկաւագ Կարապետեանին, Լորիս սարկաւագ Անդրէասեանին, Սիմոն սարկաւագ Իգիթեանին, Գէորգ սարկաւագ Միրզոյեանին, Արթուր սարկաւագ Օհանեանին, Արթուր սարկաւագ Արամեանին:

      Պարգեւաբաշխութիւնից յետոյ Ամենայն Հայոց Կաթողիկոսն իր հայրական օրհնութիւնն ու բարեմաղթանքները փոխանցեց ներկաներին:

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին