Գործն է անմահ, լա՛ւ իմացէք,
Որ խօսւում է դարեդար,
Երնե՜կ նըրան, որ իր գործով
Կ՛ապրի անվերջ, անդադար։
Յովհաննէս Թումանեան
Անցած է արդէն մէկ տարի ԹՄՄ Ամերիկայի եւ Գանատայի Կեդրոնական Վարչութեան ատենապետ, ՌԱԿի ղեկավար, ՌԱԿի Համադրուած Մամուլի հիմնասիւներէն, համբաւաւոր մտաւորական, հրապարակախօս եւ հրապարակագիր՝ ընկ. Երուանդ Ազատեանի կորուստի թուականէն:
Երուանդ Ազատեան նուիրեալ մըն էր Ռամկավար Ազատական Կուսակցութեան եւ Թէքէեան Մշակութային Միութեան, որուն աւանդը մեծ է մեր կազմակերպութեան արդի պատմութեան մէջ:
Հայկական դատի անվեհեր մարտիկ՝ ընկ. Ազատեանի կուռ գրիչին պատկանող, խորքային կերպով վերլուծուած ազգային եւ աշխարհաքաղաքական իրավիճակին նուիրուած յօդուածներու բացակայութեան մասին կարօտով կ՛անդրադառնան այսօր ՌԱԿ-ի մամուլի ընթերցողներու մեծ ընտանիքը :
Ընկ. Ազատեանին մահուան Ա. տարելիցին առիթով շուտով լոյս պիտի տեսնէ պատշաճ հրատարակութիւն մը:
«Զ.»
