Պէյրութ, 28 Յուլիս 2022
Յարգարժան վշտակից անդամներ ՀԲԸՄ-ի Գահիրէի Շրջանակային վարչութեան եւ համայն սգակիրներ,
Խոր ցաւով իմացանք Հայկական Բարեգործական Ընդհանուր Միութեան Գահիրէի ատենապետ, հասարակական գործիչ, հրապարակախօս, մտաւորական տոքթ. Վիգէն Ճիզմեճեանի անժամանակ, յանկարծակի եւ անողոք մահը:
Դառնօրէն կը սգանք, որովհետեւ այնքա՜ն շուտ հեռացաւ, այնքա՜ն շատ բան տակաւին կրնար կատարել, որովհետեւ տակաւին շատ երազանքներ եւ տեսիլքներ մնացին անաւարտ:
Մեր բոլորին համար անմոռանալի պիտի մնայ անոր անսպառ եռանդը, միշտ կենսախինդ կերպարը, խանդավառ ջերմութիւնը, շրջապատին հանդէպ անոր սիրալիր վերաբերմունքը:
Հիմա այս խորհրդաւոր պահուն կրնանք անվարան հաստատում մը կատարել՝ անգնահատելի պիտի մնայ տոքթ. Վիգէն Ճիզմեճեանի ներդրումը ՀԲԸՄ-ի ընտանիքին եւ յատկապէ’ս ՀԲԸՄ-ի Եգիպտոսի պատմութեան մէջ:
Յանուն Հայ Երիտասարդաց Ընկերակցութեան Կեդրոնական Վարչութեան կը ցաւակցինք Եգիպտոսի շրջանի մեր բոլոր միութենականներուն, հանգուցեալին տիկնոջ՝ Ալինին, անոր երկու դուստրերուն եւ համայն ՀՄԸՄ-Նուպարականներուն:
Ի խորոց սրտէ կ’աղօթենք սիրելի տոքթ. Վիգէն Ճիզմեճեանի հոգու խաղաղութեան ու փրկութեան համար:
Խորին ափսոսանքով մեր գլուխները կը խոնարհենք անոր արդար եւ երախտաշատ վաստակին առջեւ:
Տոքթ. Վիգէն Ճիզմեճեանի յիշատակը վառ պիտի մնայ բոլոր ՀԲԸՄ-ականներու եւ ՀՄԸՄ- Նուպարականներու սրտին մէջ:
Աստուած խաղաղութիւն պարգեւէ անոր հոգւոյն: