ՀԲԸՄ- ՀՄԸՄ Նուպար Գահիրէի ընտանիքը սրտի դառն կսկիծով կը գուժէ հաւատաւոր միութենական, ազգային-հասարակական գործիչ, տոքթ. Վիգէն Ճիզմեճեանի անժամանակ մահը:
Հանգուցեալը ծնած է Գահիրէ, 1961-ին: Յաճախած է ՀԲԸՄ-ի Նուպարեան վարժարանը: Իբրեւ ատամնաբոյժ, 1984-ին վկայուած է Գահիրէի Քասր էլ Էյնիի համալսարանէն:
Միութենական, ազգային բազմաթիւ պաշտօններու կողքին,զանազան պարտականութիւններ ստանձնած է ՖԻՖԱ-ի ընտանիքին մէջ: Շրջան մը եղած է Ափրիկէի ֆութպոլի Ֆետերասիոնին պաշտօնական խօսնակը: 1994-2006՝ ՖԻՖԱ-ի Մոնտիալի խաղերու կազմակերպիչ յանձնախումբի անդամ, ՖԻՖԱ-ի մամլոյ յանձնակատար, Եգիպտոսի ֆութպոլի ֆետերասիոնի անդամ:
Տոքթ. Վիգէն Ճիզմեճեան պիտի մնայ նուիրեալ միութենականի տիպար: Ան եղած է ՀՄԸՄ Նուպար Գահիրէի սկաուտական շարժումի խմբապետ: Ատենապետ՝ ՀՄԸՄ Նուպար Գահիրէի, Հայ Առաքելական եկեղեցւոյ հոգաբարձութեան անդամ: Անոր վստահուած էր միութենական եւ ազգային պատասխանատու պաշտօններ: Երկար տարիներ եղած է www.agbuegypt.com եւ www.arminmedia.com լրատուական կայքերուն խմբագիրը: Մինչեւ օրս, ձեռնհասօրէն կը վարէր ՀԲԸՄ Եգիպտոսի փոխատենապետի եւ ՀԲԸՄ Գահիրէի ատենապետի պարտականութիւնները:
Յիշատակն արդարոց օրհնութեամբ եղիցի:
