Երէկ կէս գիշերին աւարտեցաւ Լիբանանի երեսփոխանական ընտրութիւններու թեկնածութեանց ցանկերու գրանցումի վերջին պայմանաժամը, որ նաեւ ազդակ մըն է ընտրութիւններու նախապատրաստական աշխատանքներու գոնէ երեւութապէս յառաջ մղումին: Եւ մինչ բոլոր կողմերը արդէն իսկ սկսած են ընտրապայքարի ծանր գործընթացին, կ՛ըսուի թէ յառաջիկայ 15 Մայիսին Լիբանանի երեսփոխանական ընտրութիւններ կրնայ տեղի չունենալ: Պատճառը՝ արեւմտեան պատկանելիութեամբ կեդրոնի մը ուսումնասիրութեան արդիւնքներն են, ըստ որուն ընտրութիւնները պիտի արտադրեն խորհրդարան մը, որ այնքան ալ ի նպաստ չէ արեւմտեան երկիրներու շահերուն: Յետաձգումի վարկածը կը համընկնի նաեւ տեղական կողմի մը շահերուն հետ, որ պատրաստ չէ առանց նախապայմաններու ճամբան հարթել դէպի աւելի ուշ կայանալիք նախագահական ընտրութիւններ:
Ամէն պարագայի շատ ժամանակ չմնաց այս վարկածը հաստատելու կամ անճիշդ դուրս գալուն: Կը մնայ կարեւոր մտահոգութիւն մը. քաղաքական կամ ապահովական ի՞նչ զարգացում պէտք է տեղի ունենայ, որ յետաձգէ ընտրութիւններուն իրենց թուականին կայացումը: