Հինգշաբթի, 29. 09. 2022

Ամենայն Հայոց Կաթողիկոսը Մասնակցեց ՀՀ Նախագահի Երդմնակալութեան Արարողութեանը

Մարտի 13-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը ներկայ գտնուեց Կարեն Դէմիրճեանի անուան մարզահամերգային համալիրում հրաւիրուած Հայաստանի Հանրապետութեան Ազգային ժողովի յատուկ նիստին, որի ընթացքում տեղի ունեցաւ Հայաստանի Հանրապետութեան նորընտիր նախագահ տիար Վահագն Խաչատուրեանի երդմնակալութեան արարողութիւնը:

Արարողութեան ընթացքում Ամենայն Հայոց Կաթողիկոսն իր պատգամը փոխանցեց ներկաներին, ապա միասնական Տէրունական աղօթքից յետոյ «պահպանիչ» աղօթքով իր օրհնութիւնը բաշխեց ՀՀ նախագահ Վահագն Խաչատուրեանին:

Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ

ՀՀ ՆԱԽԱԳԱՀԻ ԵՐԴՄՆԱԿԱԼՈՒԹԵԱՆ ԱՐԱՐՈՂՈՒԹԵԱՆ ԱՌԻԹՈՎ

(Երեւան, 13 մարտի, 2022 թ.)

Մեծարգոյ նախագահ Հայաստանի Հանրապետութեան,

մեծարգոյ նախագահ Արցախի Հանրապետութեան,

մեծարգոյ վարչապետ,

մեծարգոյ նախագահ Ազգային ժողովի եւ յարգելի ներկաներ,

Այսօր մասնակից ենք հայրենական կեանքի կարեւոր իրադարձութեան` Հայաստանի Հանրապետութեան նորընտիր նախագահի երդմնակալութեան արարողութեանը, որի առիթով Հայրապետական Մեր օրհնութիւնն ու բարեմաղթանքներն ենք բերում Ձեզ, պարոն նախագահ, եւ մեր ողջ ժողովրդին:

Երեսուն տարիներ առաջ մեր ժողովուրդը հերոսական պայքարով վերակերտեց իր անկախ պետականութիւնը` անցնելով մաքառումների եւ փորձութիւնների դժուարին ուղիով: Այդ տարիների ընթացքում մեր պետականութեան կայացման ճանապարհին երկրի առաջնորդութիւնը յանձն առան չորս նախագահներ: Այսօր Դուք էք ստանձնում այդ պատասխանատու պաշտօնը, որ խորհրդանիշն է հայոց անկախ պետականութեան:

Ձեր պաշտօնակալութիւնը տեղի է ունենում դժուարին ժամանակահատուածում, երբ հայրենիքը վիրաւոր է արցախեան պատերազմի աղէտալի կորուստներով, եւ յաղթահարուած չեն պատերազմի առաջ բերած մարտահրաւէրները, երբ տակաւին գերութեան մէջ են եւ անյայտ կորած մեր զաւակները, եւ պարբերաբար շարունակւում են ոտնձգութիւնները հայրենեաց սահմանների նկատմամբ, երբ ներազգային կեանքում տիրող անհանդուրժողականութեան մթնոլորտը եւ ներհասարակական բեւեռացուածութիւնը շարունակում են խռովել մեր ժողովրդի հոգին:

Ամէնքս այսօր մտահոգ ենք մեր երկրի իրավիճակով, երերուն է խաղաղութիւնը Հայաստանում ու Արցախում, ծառացած են արցախահայութեան իրաւունքների պաշտպանութեան եւ հակամարտութեան խաղաղ ու արդար կարգաւորման հարցերը, եւ ապագան անորոշութիւններ է պարունակում:

Մտահոգ ենք եւ աշխարհը փոթորկող տագնապներով ու հակամարտութիւններով, աշխարհաքաղաքական եւ տարածաշրջանային բարդ զարգացումներով: Ներկայիս ծանրագոյն մարտահրաւէրների պայմաններում հրամայական են ներհասարակական հաշտութեան օրակարգի իրականացումը, ազգային միասնականութեան վերականգնումը, հայրենիքի ապագայի եւ ազգային նպատակների շուրջ համընդհանուր տեսլականի ձեւաւորումը, որով կարելի կը լինի յաղթահարել առկայ խնդիրները, զօրացնել մեր պետականութիւնը, հետամուտ լինել անվտանգային հարցերի լուծմանը, համախմբել համազգային ողջ ներուժը` ի շահ հայրենիքի եւ ժողովրդի:

Ցաւով ենք անդրադառնում, որ երկփեղկուած է մեր ժողովուրդը ոչ միայն Հայաստանում, այլեւ սփիւռքում` պայմանաւորուած հայրենիքում տեղ գտնող մտահոգիչ զարգացումներով, ինքնութեան ճգնաժամով եւ ներքին խնդիրներով: Սփիւռքի համայնքների ու աւանդական կազմակերպութիւնների զօրացումը նոյնպէս պէտք է լինի հայրենի պետութեան առաջնահերթութիւնը:

Որպէս պետութեան գլուխ` Հանրապետութեան նախագահի իրաւասութեան տիրոյթում է հետամուտ լինելը երկրում արդարութեան ու օրինականութեան գերակայութեանը, համապետական եւ համազգային շահերի պաշտպանութեանը, որով, պարոն նախագահ, պիտի նպաստէք մեր ժողովրդի ու հայրենիքի վէրքերի ամոքմանը, պետութեան առաջընթացին եւ ապահով գալիքի կերտմանը: Մաղթում ենք, որ Աստծոյ եւ ժողովրդի առջեւ կատարած Ձեր երդումը մշտապէս ուժի եւ զօրութեան, անմնացորդ նուիրումի աղբիւր լինի` արդիւնաւորելու պատասխանատու եւ դժուարին Ձեր առաքելութիւնը:

Հայոց Եկեղեցին, ինչպէս բոլոր ժամանակներում իր կոչմանը եւ ծառայութեանը հաւատարիմ, այսօր եւս շարունակելու է հայրենի պետութեան հետ գործակցութիւնը Սահմանադրութեան ոգուն համահունչ` յանուն մեր անկախ պետականութեան եւ մեր ժողովրդի խաղաղ ու բարօր, համերաշխ ու միաբան կեանքի` միշտ ուսուցանելով առաքեալի յորդորը. «Նոյն բանը խորհեցէք, նոյն սերն ունեցէք ձեր մէջ, եղէք միաշունչ, միախորհուրդ» (Փիլիպ. 2.2):

Պատմութեան հոլովոյթներում ազգային մեր միաբանութիւնը եւ հայրենաշէն ձեռքբերումները խարսխուել են ամենատարբեր փորձութիւնների դիմակայած մեր նուիրական արժէքների վրայ: Մեր ազգային արժեհամակարգը այսօր էլ պէտք է սրբութեամբ պահպանուի, իբրեւ գրաւական մեր ինքնութեան եւ գոյութեան, եւ դիտարկուի ամուր հիմը, մեր ժողովրդի զաւակների կրթութեան ու դաստիարակութեան:

 Չափազանց մեծ է այն գինը, որը մենք վճարել ենք անկախ պետականութեան վերակերտման ճանապարհին: Հայրապետական Մեր յորդորն ենք ուղղում համայն մեր ժողովրդին` ապրենք եւ առաջնորդուենք գիտակցութեամբ, որ հայրենիքը Աստծոյ պարգեւն է մեր ազգին, եւ իւրաքանչիւրս կոչուած ենք ամէն յանձնառութիւն ստանձնելու, ջանք եւ եռանդ չխնայելու` յանուն մեր երկրի հզօրութեան եւ պայծառութեան: Հաւատով նորոգուենք եւ մեր կեանքը շաղախենք հայրենեաց անսակարկ սիրով եւ բարեպաշտ ընթացքով: Ինչպէս սաղմոսերգուն է ասում, մեր աստուածահաճոյ արարումներով «մեծարենք Տիրոջը, բարձրացնենք Նրա անունը միասին» (Սաղմ. 33.4) եւ յոյսով ու լաւատեսութեամբ զօրացած` համատեղ գործենք յանուն մեր լուսաւոր գալիքի:

Աղօթում ենք առ Բարձրեալն Աստուած, որ անվտանգ ու արժանապատիւ կեանքի նոր հորիզոններ բացի մեր ժողովրդի առջեւ` խաղաղութեան մէջ պահելով աշխարհը համայն, Հայաստան ու Արցախ մեր հայրենիքը եւ համբերատարութեան ու տոկունութեան մէջ զօրացնելով հաւատաւոր մեր բոլոր զաւակներին:

Թող Երկնաւոր Տիրոջ շնորհը, սերն ու ողորմութիւնը լինեն ամէնքիս եւ ողջ մարդկութեան հետ, այսօր եւ յաւիտեանս. ամէն:

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին