ՈՒՂԵՐՁ
Սիրելի հաւատաւոր զաւակներ,
Հոգեւոր կեանքի ճանապարհի կարեւոր հանգրուանին ենք վերստին: Պատրաստւում ենք Մեծ Պահքին: Այս խորհրդաւոր ժամանակաշրջանում զղջմամբ ու ապաշխարութեամբ հայցում ենք Աստծոյ ողորմութիւնը մեղքերի ներման եւ փրկութեան շնորհին արժանի լինելու համար:
Սիրելիներ, պահքը համընդհանուր ապաշխարութեան, ինքնամաքրման եւ ինքնակատարելագործման ճանապարհն է ցոյց տալիս, Աստծոյ արքայութեան ժառանգորդը լինելու շնորհը պարգեւում, միտքն ազատում տագնապալի ու յուսահատ խոհերից, հոգուն սրբութիւն է բերում եւ մարմնին` օգտակարութիւն: Պահեցողութիւնը օգնում է մեզանում կատարելութեան նախանձախնդրութիւնը զօրացնել, սեր եւ հաճութիւն տարածել առ մերձաւորը, հաստատել բարիք ու խաղաղութիւն ընտանեկան կեանքում, շրջապատում եւ հասարակութիւնում: Այսպիսի հոգեշահ իրագործումները ուժ են տալիս, որպէսզի զօրանանք տէրունապատուէր խոնարհութեան ու հեզութեան մէջ (Մատթ. 11.29), հեռու մնանք կամայականութիւնից եւ կատարենք մեր Տիրոջ եւ Փրկչի կամքը:
Իւրաքանչիւրս մեր կոչման ու ծառայութեան մէջ պէտք է դրսեւորենք այս բարի վարքը: Ամէնքս պահեցողութեան նախանձախնդրութեամբ զերծ լինենք անձնակենտրոն նկրտումներից ու վնասակար ընթացքներից, գործենք ընդհանուրի բարիքի համար: Ջանք ներդնենք` Քրիստոսաւանդ պատուիրանների համաձայն ապրելու աստուածօրհնեալ մեր կեանքը, յաղթահարելու անարդարութիւնը, մխիթարութիւն բերելու վշտացեալներին, աջակցութիւն կարիքաւորներին: Պատերազմի դառնութիւնները ճաշակած մեր ժողովրդի վիրաւոր հոգուն սպեղանի է պահքը, յոյսի լուսաւոր շող, ցաւի ամոքում, քանզի մեզ կոչում է լաւատեսութեամբ ներշնչուելու, քաջալերուելու, աւելի լաւ իրականութիւն ստեղծելու, որտեղ մեղքի ու մահուան փոխարէն թագաւորում են առաքինութիւններն ու աստուածահաճոյ կեանքը:
Աղօթենք միասին, որ մեր պահեցողութեամբ ու ապաշխարութեամբ Աստուած մեզանից հեռացնի ամէն անկատարութիւն ու մեղսաւոր ընթացք եւ խաղաղութեան, համերաշխութեան ու հոգեւոր ուրախութեան մէջ հաստատի մեր կեանքը: Հայցենք, որ արժանի լինենք Տիրոջ ամենառատ ողորմութեանը եւ Փրկչի հրաշափառ Յարութեան տօնը դիմաւորենք մաքուր սրտով ու հոգով: Թող մեր Տէր եւ Փրկիչ Յիսուս Քրիստոսի սերը եւ շնորհները լինեն մեզ հետ եւ ամէնքի, այսօր եւ միշտ. ամէն:
