Երեքշաբթի, 27. 09. 2022

Ամենայն Հայոց Կաթողիկոսն Ընդունեց «Մարդու Իրաւունքներ Եւ Պատասխանատուութիւն. Պատերազմի Հետեւանքները» Միջազգային Համաժողովի Մասնակիցներին

Յունիսի 4-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց «Ճշմարտութեան եւ արդարադատութեան կենտրոնի» կողմից կազմակերպուած «Մարդու իրաւունքներ եւ պատասխանատուութիւն. պատերազմի հետեւանքները» առաջին միջազգային համաժողովի մասնակիցներին:

Հայցելով Վեհափառ Հայրապետի օրհնութիւնը` «Ճշմարտութեան եւ արդարադատութեան կենտրոնի» նախագահ Գոռ Մնացականեանը տեղեկացրեց, որ Հայաստան են ժամանել իրաւաբաններ եւ միջազգային իրաւունքի առաջատար փորձագէտներ 16 երկրներից` քննարկելու 44-օրեայ պատերազմի արդիւնքում արցախահայութեան, ռազմագերիների, տեղահանուած անձանց իրաւունքների ոտնահարումներին եւ միջազգային արդարադատութեանն առնչուող խնդիրները:

Հանդիպմանը Նորին Սրբութիւնը, ընդգծելով միջազգային գիտաժողովի կարեւորութիւնը, յատկապէս հայ ժողովրդի համար այս դժուարին ժամանակներում, յոյս յայտնեց, որ իրաւաբաններն ու միջազգային իրաւունքի առաջատար փորձագէտները, հաղորդ կը դառնան Հայաստանի ու Արցախի առջեւ ծառացած մարտահրաւէրներին եւ միջազգային հարթակներում կը պաշտպանեն հայ ժողովրդի արդար իրաւունքները:

Զրոյցի ընթացքում Նորին Սրբութիւնն անդրադարձ կատարեց նաեւ արցախեան 44-օրեայ պատերազմին եւ դրա հետեւանքներին, գերիների վերադարձման խնդրին, Ադրբեջանի կողմից տարուող հայատեաց քաղաքականութեանը, որն ուղղուած է ոչ միայն արցախահայութեան, այլեւ Ադրբեջանի վերահսկողութեան տակ յայտնուած համամարդկային նշանակութիւն ունեցող կրօնական, հոգեւոր-մշակութային կոթողների դէմ:

Հայոց Հովուապետը նաեւ իր գնահատանքը փոխանցեց գիտաժողովի կազմակերպիչներին եւ մասնակիցներին նման կարեւոր նախաձեռնութիւն դրսեւորելու համար` փորձելով նպաստել յետպատերազմեան դժուարութիւնների յաղթահարմանը:

Հանդիպմանը Վեհափառ Հայրապետը պատասխանեց նաեւ հիւրերի հարցերին, որոնք առնչւում էին հայկական հոգեւոր արժէքների պահպանութեանը եւ այդ ուղղութեամբ Մայր Աթոռի կողմից իրականացուող աշխատանքներին:

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին