Հինգշաբթի, 29. 09. 2022

Անցած են Բռնութեամբ ու Զեղծարարութեամբ Ազատախոհ Հայորդիներ Ահաբեկելու ու անոնց Քուէները Կեղծելու Օրերը

15 Մայիսի Լիբանանի խորհրդարանական ընտրութեանց թուականը մօտենալուն զուգահեռ, հայկական  ծանօթ կողմի՝ Հայ Յեղափոխական Դաշնակցութեան Լիբանանի կառոյցին մենատիրական, վարկաբեկուած ներկայ ղեկավարութեան սադրանքներն ու գրգռութիւնները օրէ օր կը բազմապատկուին եւ նորանոր դրսեւորումներ կ’ունենան:

Փտածութեան ռահվիրայ՝ տուեալ ղեկավարութեանը ստրկանալ մերժող հայկական կողմերն ու ազատախոհ հայ անհատները, նոյնիսկ իրենց իսկ կուսակցականները, վերոյիշեալ մարդուկներուն ծառայելու համար ստեղծուած ընկերային համացանցի հարթակներու՝ նամանաւանդ ֆէյսպուքի յաճախ շինծու եւ կեղծ էջերու միջոցով թիրախ կը դառնան ցեխարձակումներու, զրպարտութիւններու, վիրաւորանքներու եւ հայհոյանքներու: Ցեխարձակողները իրենք զիրենք կարգած են Լիբանանի հայ համայնքին շահերու միակ պաշտպանը եւ ազգին սերուցքը:

Այս արշաւին մէջ, այդ ողորմելի արարածները վերջին օրերուն սկսած են ներհայաստանեան քաղաքական հակադրութիւնները խառնել լիբանանեան ընտրական գործընթացին՝ միշտ յոյս ունենալով պղտոր ջուրի մէջ ձուկ որսալու: Անհեթեթութիւնը հասած է հոն, որ Ազատախոհ Լիբանանահայերու Համախմբումին մաս կազմող եւ ՀՀ-ի այսօրուան իշխանութեանց նկատմամբ խիստ քննադատական դիրքորոշում ունեցող կառոյցներ եւ անձնաւորութիւններ կ’ամբաստանուին Հայաստանի ներկայ իշխանութեանց յանձնարարութիւնները կատարելու աւելի քան ծիծաղելի մեղադրանքով:

Մենատիրական անբուժելի ախտով վարակուած շարք մը ՀՅԴ-ական ղեկավարներ, որոնք նաեւ անընդունելի են բազմաթիւ ՀՅԴ-այականներէ, այսքանով չբաւարարուելով, անցած են բացայայտ բռնութեան: Լիբանանի երեսփոխանական յառաջիկայ ընտրութիւններուն իրենց թեկնածուներուն մրցակից թեկնածուներու համակիրներ կ’ենթարկուին հոգեբանական ճնշումներու, հալածանքներու եւ այլամերժ խտրականութեան վերաբերմունքի: Տուեալ կուսակցութեան պնդագլուխ (ան)պատասխանատուներ այնքան յառաջ գացած են իրենց ամբարտաւանութեան մէջ, որ իրենց քմայքներուն չենթարկուող իւրայիններուն իսկ, օր ցերեկով կը սպառնան մարմնական հաշուեյարդարի ենթարկել: Մէկ խօսքով, դարձեալ գործի կը դրուին «Ով որ մեզմէ չէ, հայ չէ» եւ «Ով որ մեզմէ չէ, մեզի թշնամի է» գարշահոտ ու պատմութեան աղբանոցին միայն պիտանի այլամերժ յիմարաբանութիւնները:

Իրենց մտածելակերպով ու աշխատանքային ոճով անցեալին մէջ մնացած՝ քարացած ուղեղով ՀՅԴական շեֆերուն ու անոնց կամակատար «զաիմներուն» կ’ուզենք յիշեցնել, որ շատո՜նց անցած են «զոփփաճիութեամբ» ազատախոհ հայորդիներ ահաբեկելու օրերը: 2022-ի Լիբանանը տարբեր է 1950-60-ականներու Լիբանանէն, երբ երկրին օրուայ իշխանութեանց բացայայտ կամ թաքուն մեղսակցութեամբ, նշեալ «զաայիմները» զեղծարարութիւններով ու բռնութիւններով իրենց կամքը կը պարտադրէին հայ ընտրողներուն վրայ:

Վերջապէս, ապօրինութիւններու եւ ոճրագործութիւններու անմրցելի ախոյեան մենատիրական նման  ղեկավարներու կը թելադրենք միանգամ ընդմիշտ համակերպիլ նախկին բարդոյթներէ ձերբազատուած լիբանանահայութեան այսօրեայ ազատախոհ ոգիին հետ, որ կը ձգտի արդարութեան ու ազգային զարթօնքի, յանուն համընդհանուր շահին:

Վայ անոր, որ տակաւին կը յամենայ հասկնալ անխուսափելի «փոփոխութեան քամիին» անզսպելի ուժն ու մօտալուտ յաղթանակը:

Ազատախոհ Լիբանանահայերու Համախմբում
Պէյրութ, 25 Ապրիլ 2022

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին