Հայկազեան Համալսարանի նախաձեռնութեամբ Հայաստանի Հանրապետութեան Յովհաննէս Շարամբէեանի անուան ժողովրդական արուեստներու թանգարանի մասնագէտներ լիբանահայ աշակերտներուն պիտի սորվեցնեն հայկական գորգի զարդանախշեր

6 Ապրիլ 2022-ին սկիզբ առաւ Հայկազեան Համալսարանի նախաձեռնութեամբ Պէյրութ ժամանած Հայաստանի Հանրապետութեան Յովհաննէս Շարամբէեանի անուան ժողովրդական արուեստներու թանգարանի երկու մասնագէտներու տասնօրեայ աշխատանոցը:

Ըստ ծրագրի՝ հայրենի մասնագէտները պիտի այցելեն լիբանահայ դպրոցները եւ շուրջ երկժամեայ աշխատանոցային ծրագրով լիբանահայ աշակերտներուն պիտի ծանօթացնեն հայկական գորգը, անոր իւրայատկութիւնները, յատկանիշերը եւ սորվեցնեն հայկական գորգի զարդանախշերը: Այնուհետեւ աշակերտները հայկական գորգի նախշերով գծուած եւ յատուկ պատրաստուած տախտակներու վրայ, իրենց տրամադրուած ներկերով պիտի ներկեն զարդանախշերը, ու իրենց հետ տանին իրենց տուները:

Ծրագիրը նպատակ կը հետապնդէ աշխատանոցային ծրագրաւորումով, հայ աշակերտը ծանօթացնել հայկական գորգին եւ անոր միջոցով զինք առաւել առնչել հայ մշակոյթին:

Ծրագրին նիւթապէս սատար կը կանգնին Պօղոսեան ու Թիւֆենքեան Հիմնարկները:

Հայկազեան Համալսարանի

ուսանողական գրասենեակ