Լիբանանահայ Կեանք
10 Մարտ 2022-ին Հայկազեան համալսարանը յարգանքի տուրք մատուցեց իր հոգաբարձուներու խորհուրդի անդամ տոքթ. Յարութիւն Նիկոլեանին, որ անցեալ տարի իր մահկանացուն կնքեց՝ «Քորոնա» ժահրով վարակուելուն պատճառով:
Տոքթ. Յարութիւն Նիկոլեանին նուիրուած յիշատակի երեկոն տեղի ունեցաւ Հայկազեան համալսարանի «Մուկար» սրահին մէջ: Ձեռնարկին ուղիղ սփռումը կատարուեցաւ Դիմատետրով:
Այս առիթով, հանգուցեալ տոքթ. Նիկոլեանի գեղանկարներէն մաս մը առցանց ցուցադրուեցաւ՝ վաճառքի նպատակով, որուն հասոյթը պիտի տրամադրուի համալսարանի «Սաներու ֆոնտ»-ին:
Ձեռնարկին բացումը կատարեց համալսարանի հանրային կապերու պատասխանատու տիկին Միրա Եարտըմեանը, որ ներկայացուց հանգուցեալին յատկանիշները՝ իբրեւ արհեստավարժ բժիշկ, արուեստագէտ եւ մտաւորական:
Այս առիթով, Հայաստանէն դոկտ. Երուանդ Խաչատրեան խօսեցաւ տոքթ. Յարութիւն Նիկոլեան արուեստագէտին, բանաստեղծին եւ մտաւորականին մասին՝ ներկայացնելով անձնական կեանքէ դրուագներ եւ յուշեր:
Իր կարգին, Հայկազեան համալսարանի նախագահ, վեր. դոկտ. Փոլ Հայտոսթեան ուղղեց իր սրտի խօսքը՝ տոքթ. Նիկոլեանը ներկայացնելով իբրեւ իւրայատուկ անձնաւորութիւն՝ նկարագրային յատուկ գիծերով:
