Շաբաթ, 18 Սեպտեմբեր 2021-ին, Ն.Ս.Օ.Տ.Տ. Արամ Ա. Վեհափառ Հայրապետը, Պիքֆայայի Սուրբ Աստուածածին Վանքին մէջ, ընդունեց այցելութիւնը Հայկական Բարեգործական Ընդհանուր Միութեան նախագահ Պերճ Սեդրակեանի, ընկերակցութեամբ Միութեան Լիբանանի Շրջանակային Յանձնաժողովի ատենապետ Ժերար Թիւֆէնքճեանի։
Աւելի քան երկու ժամ տեւած հանդիպումը առիթ մը հանդիսացաւ լայն քննարկումի ենթարկելու Լիբանանի ու Հայաստանի առնչուած շարք մը այժմէական խնդիրներ։ Այս ծիրէն ներս յատուկ անդրադարձ կատարուեցաւ Լիբանանի հայութեան դիմագրաւած դժուարութիւններուն, Հայաստան-Սփիւռք յարաբերութեանց դիմաց կանգնող մարտահրաւէրներուն, ինչպէս նաեւ Սփիւռքը վերակազմակերպելու հրամայականին։
