Մայր Աթոռ Սուրբ Էջմիածինը ցաւով է արձանագրում, որ Արցախեան երկրորդ պատերազմի ընթացքում եւ յետպատերազմեան շրջանում չեն դադարել հայոց հոգեւոր եւ մշակութային ժառանգութեան հանդէպ Ադրբեջանի կողմից իրականացուող բարբարոսական գործողութիւնները։
Այսօր, յարաբերական խաղաղութեան պայմաններում, շարունակւում են թիրախաւորուել հայոց սրբավայրերը՝ նպատակ հետապնդելով վերացնել Արցախի պատմական մեր հողի վրայ հայկական ինքնութեան հետքերն ու վկայութիւնները։ Ադրբեջանի վերահսկողութեան տակ անցած տարածքներում արդէն իսկ ոչնչացուել են սրբավայրեր, պղծուել վանքեր ու եկեղեցիներ եւ վերացուել դրանց պատմական պատկանելիութիւնը հաւաստող արձանագրութիւններ, անարգուել խաչքարեր եւ նախնեաց շիրիմներ։ Պատմութեան խեղաթիւրման եւ կեղծման ճանապարհով փորձեր են կատարւում իւրացնել այդ տարածքներում առկայ շուրջ 150 հայկական սրբատեղիները եւ աշխարհին ներկայացնել իբրեւ ուդիների կրօնական ժառանգութիւն։ Օրեր առաջ յայտնի դարձաւ նաեւ վերանորոգութեան պատճառաբանութեամբ Արցախի թեմի առաջնորդանիստի՝ Շուշիի Ղազանչեցոց Սուրբ Ամենափրկիչ տաճարի հոգեւոր խորհրդանիշները վերացնելու եւ գմբէթի վեղարը վայր բերելու փաստը։
Մայր Աթոռ Սուրբ Էջմիածինը դատապարտում է Ադրբեջանի իշխանութիւնների կողմից իրականացուող մշակութային եղեռնագործութիւնը, ինչն անսքօղ արտայայտութիւն է հայատեացութեան, անհանդուրժողականութեան եւ թշնամանքի։
Հակառակ հնչող յայտարարութիւնների եւ արդարացումների, որդեգրուած այս քաղաքականութիւնը չի կարող որեւէ կերպ նպաստել տարածաշրջանում կայունութեան եւ տեւական խաղաղութեան վերահաստատմանը։
Հայաստանեայց Առաքելական Սուրբ Եկեղեցին պիտի շարունակի այս խնդիրները բարձրաձայնել միջազգային հանրութեան եւ պատկան կառոյցների առջեւ՝ կասեցնելու հայ ժողովրդի իրաւունքները ոտնահարող այս երեւոյթները։
