Ընկերային ցանցերու մէջ տարածուած են Մոսկուայի «Մէկա» առեւտուրի կեդրոնին մէջ տեղադրուած աղբամաններու լուսանկարները, որոնք, իբր, ներկուած են ազրպէյճանական դրօշի գոյներով: Աղբամաններուն վրայ նաեւ գրուած է` «Գոյնը նշանակութիւն ունի»: Ըստ «PanArmenian.net»-ի՝ ազերիները այս պատճառով համար կը մեղադրեն հայերը:
Լուսանկարը զայրացուցած է ազերիները եւ ո՛չ միայն շարքային քաղաքացիները, այլ նաեւ քաղաքական գործիչները, որոնք կատարուածին մէջ վիրաւորանք եւ սադրանք կը տեսնեն հայերու կողմէ:
Ի դէպ, աղբամանները սովորական տեսք ունին, բաժնուած են երեք տարբեր գոյներու եւ մասերու. կապոյտը նախատեսուած է թուղթի համար, կարմիրը` կերպընկալի, կանաչը` այլ աղբի:
Ըստ ազրպէյճանցիներու, սադրանքին նպատակը Ազրպէյճանի մէջ Ռուսիոյ հանդէպ դժգոհութիւն յառաջացնելն է։
«Ենի Ազրպէյճան» կուսակցութեան գործկոմի քաղաքական վերլուծութեան եւ կանխատեսման բաժինի վարիչ, ռուս-ազրպէյճանական միջխորհրդարանական կապերու աշխատանքային խումբի անդամ Այտին Միրզազադէն յայտարարած է. «Մեզի կը վշտացնէ, որ աղբամանները ներկուած են ազրպէյճանական դրօշին գոյներով: Ասիկա վիրաւորանք է Ազրպէյճանի հանդէպ: Կը կարծեմ, Ռուսիան շուտով կը լուծէ այդ խնդիրը»:
Ըստ անոր՝ այդ արարքին ետեւը կանգնած են Ազրպէյճանը չսիրող ուժերը, կը գրէ «BAKU.WS»-ը:
«Սադրանքին նպատակը Ազրպէյճանի մէջ Ռուսիոյ հանդէպ դժգոհութիւն յառաջացնելն է: Հնարաւոր է, պատճառը ռուսական զէնքի նոր խմբաքանակի գնումն է: Սփիւռքահայերու որոշ շրջանակներ կը փորձեն այդ կերպով փճացնել երկու երկիրներու բարեկամական յարաբերութիւնները: Ես շատ կը փափաքէի, որ այդ հարցը դառնար Ռուսիոյ մէջ Ացրպէյճանի դեսպանութեան ուշադրութեան առարկան եւ մեղաւորները պատժուէին: Եթէ հարցը չլուծուի, մենք պաշտօնապէս պիտի դիմենք: Բայց ես վստահ եմ, որ արդէն այսօր հարցը լուծում պիտի ստանայ»,- ըսած է Միրզազադէն:
