«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Կքննարկվի 1988-1992 թվականներին Ադրբեջանից բռնագաղթած և Հայաստանի քաղաքացիություն ստացած անձանց կողմից զբաղեցված բնակելի տարածքները սեփականաշնորհելու մասին հարցը: Այն ներառված է այսօր` հոկտեմբերի 12-ին, կայանալիք ՀՀ կառավարության նիստի օրակարգում:
ՀՀ փաստաբանների պալատում տեղի կունենա քննարկում հայ և ֆրանսիացի իրավաբանների մասնակցությամբ: Բացման խոսքով հանդես կգան Հայաստանում Ֆրանսիայի արտակարգ և լիազոր դեսպան Ջոնաթան Լակոտը, ՀՀ փաստաբանների պալատի նախագահ Արա Զոհրաբյանը և այլք:
ՀԱՊԿ միացյալ շտաբի պետ, գեներալ-գնդապետ Անատոլի Սիդորովը հանդես կգա մամուլի ասուլիսով: Այն կացկացվի Մոսկվայում, Մինսկում, Բիշքեկում, Աստանայում և Երևանում գտնվող Sputnik-ի մամուլի կենտրոնների հետ ուղիղ տեսակապի միջոցով։ Նա կանդրադառնա «Փոխգործակցություն 2017» զորավարժությունների ընթացքին։
Լրագրողների հետ կհանդիպի արտակարգ և լիազոր դեսպան Արման Նավասարդյանը: Նա իր վերլուծությունները կներկայացնի Հայաստանի և Ադրբեջանի նախագահների հանդիպմանն ընդառաջ սահմանային լարվածության, ինչպես նաև հայկական դիվանագիտության դերին Բյուլբյուլօղլուի թեկնածությունը ՅՈՒՆԵՍԿՕ-ի գլխավոր տնօրենի ընտրություններից հետ կանչելու գործում:
Հոկտեմբերի 12-ը Ծխելու դեմ պայքարի ազգային օրն է: ՀՀ ԱՆ գլխավոր մանկաբույժ Սերգեյ Սարգսյանը, առողջապահության կազմակերպիչ Արսեն Թորոսյանը կներկայացնեն ծխելու դեմ ուղղված Առողջապահության նախարարության ծրագրերը, վիճակագրություն:
Ալ.Թամանյանի անվան ճարտարապետության ազգային թանգարան ինստիտուտում կնշվի Ճարտարապետի միջազգային օրը: Միջոցառման ընթացքում ՀՀ կառավարության ղեկավարի, ՀՀ ԿԱ քաղաքաշինության պետական կոմիտեի նախագահի և Երևանի քաղաքապետի կողմից կհանձնվեն պարգևներ ոլորտի ներկայացուցիչներին և բնագավառը լուսաբանող լրագրողներին:
ԱՄՆ Միջազգային զարգացման գործակալությունը նշում է Հայաստանի ժողովրդի հետ գործընկերության 25-ամյակը: Այդ առթիվ այսօր նախատեսված է հանդիսավոր միջոցառում: Ներկա կլինեն ԱՄՆ դեսպան Ռիչարդ Միլզը, ՀՀ վարչապետ Կարեն Կարապետյանը, կառավարության անդամներ և այլ ոլորտների ներկայացուցիչներ:
Ի՞նչ բարեփոխումներ կբերի քրեակատարողական համակարգում 2018-2038 թթ. ռազմավարության ծրագիրը: ՀՀ արդարադատության նախարարի տեղակալ Սուրեն Քրմոյանը, հասարական կազմակերպությունների ներկայացուցիչներ կներկայացնեն ռազմավարության ծրագրի մանրամասները:
«Բուկինիստ» ընկերությունը՝ Երևանի քաղաքապետարանի և ՀՀ մշակույթի նախարարության աջակցությամբ հանդես է գալիս «Գրքի գիշեր-2017» միջոցառմամբ: Նախատեսված ասուլիսին Մշակույթի նախարար Արմեն Ամիրյանը, Երևանի քաղաքապետարանի աշխատակազմի մշակույթի վարչության պետ Ռուբեն Հովհաննիսյանը և «Բուկինիստ» ընկերության տնօրեն Խաչիկ Վարդանյանը կներկայացնեն մանրամասներ սպասվող միջոցառման մասին:
Գրադարանավարի օրվան նվիրված միջոցառումների շրջանակում Հայաստանի ազգային գրադարանում կանցկացվի Կոմիտասի անվան ազգային լարային քառյակի գեaղ.ղեկավար, առաջին ջութակ, ՀՀ ժողովրդական արտիստ, պետական մրցանակի և միջազգային մրցույթների դափնեկիր, պրոֆեսոր Էդուարդ Թադևոսյանի ծննդյան 70-ամյակին նվիրված միջոցառում:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
