Նախաձեռնութեամբ Ցեղասպանութեան ուսուցման ծրագիրին, Ուրբաթ, Նոյեմբեր 18ին, երեկոյեան ժամը 8ին, Սան Ֆրանսիսքոյի «Խաչատուրեան» Հայ կեդրոնի «Սարոյեան» սրահին մէջ (825 Brotherhood Way) տեղի պիտի ունենայ կազմակերպութեան գործունէութեան նուիրուած քննարկում մը, որուն ընթացքին նաեւ պիտի ցուցադրուի Նարէ Մկրտչեանի՝ «Տան Միւս Կողմը» («The Other Side of Home») վաւերագրական ֆիլմը։
Նշենք, որ ֆիլմը մէկն է «Օսքար»ի թեկնածու 10 վաւերագրական կարճ ֆիլմերէն, որոնցմէ 5ը պաշտօնապէս թեկնածու պիտի յայտարարուի յառաջիկայ տարուան Յունուար 24ին։
Ֆիլմը պատմութիւնն է Թուրքիոյ քաղաքացի կնոջ մը, որ 2015ին կը բացայայտէ, թէ իր մեծ մայրը Ցեղասպանութիւնը վերապրող մըն է, եւ կ՛որոշէ մեկնիլ Հայաստան, մասնակցելու համար Հայոց Ցեղասպանութեան 100ամեակի միջոցառումներուն։ Ֆիլմին մէջ կը պայքարին Ցեղասպանութենէն վերապրածն ու Ցեղասպանութիւնը ուրացողը:
Երեւան ծնած Նարէ Մկրտչեան Լոս Անճելըս տեղափոխուած է 15 տարի առաջ եւ մասնագիտացած է Հարաւային Քալիֆորնիոյ համալսարանի շարժապատկերի բաժանմունքին մէջ։
Ձեռնարկին մուտքը ազատ է։
Ցեղասպանութեան ուսուցման ծրագիրին մասին յաւելեալ տեղեկութեան կամ անոր աջակցելու համար, դիմել info@genocideeducation.org հասցէին եւ (415) 264-4203 թիւին, կամ այցելել GenocideEducation.org կայքը։
