Պոլսոյ ծանր յանցանքներու 5րդ դատարանը որոշած է Հրանդ Տինքի սպանութեան դատավարութիւնը սկիզբէն սկսիլ: Ըստ թրքական «Սապահ» թերթին՝ դատարանը նկատի առած է վճռաբեկ ատեանի որոշումին բովանդակութիւնը՝ վճռելով Տինքի սպանութեան գործով մեղադրուածներն ու դատապարտուածները նոր դատավարութեամբ դատել:
Նախկինին ի տարբերութիւն՝ այս անգամ բոլորը պիտի դատուին «յանցանք գործելու նպատակով յանցագործ խումբ ստեղծելու, կառավարելու, կամ այդ խումբին անդամ ըլլալու» մեղադրանքներով: Նախկին դատին մէջ այս կէտը անտեսուած էր՝ մեղմացնելով մեղադրեալներուն տրուած պատիժները:
Աւելի կանուխ, Թուրքիոյ արդարադատութեան նախարարութիւնը վճռած է դատական գործեր յարուցել ընդդէմ Տինքի սպանութեան ժամանակ կարեւոր պաշտօններ ստանձնած 9 պաշտօնատարներու, որոնց շարքին են Պոլսոյ նահանգային նախկին ոստիկանապետը, հետախուզութեան վարչութեան նախկին պետը եւ Պոլսոյ նահանգապետի նախկին տեղակալը:
