Անցնող մարզական տարեշրջանին Լիբանանի բաժակի աւարտականին հասնելէ ետք, ՀԵԸ Անդրանիկ Անթիլիաս նոր վճռակամութեամբ պիտի մասնակցի մինի ֆութպոլի Լիբանանի Ա. դասակարգի ախոյեանութեան 2022-23 տարեշրջանի մրցումներուն:
Նախքան ախոյեանութեան մեկնարկը, ՀԲԸՄ-ի Տեմիրճեան կեդրոնին մէջ, Լիբանանի մինի ֆութպոլի ֆետերասիոնին հովանաւորութեամբ եւ մասնակից 16 խումբերուն մասնակցութեամբ տեղի ունեցաւ ախոյեանութեան մրցումներուն վիճակաձգութիւնը:
Արդարեւ, մասնակից 16 խումբերը բաժնուեցան 4 խմբակներու: Իւրաքանչիւր խումբ, երթուդարձի դրութեամբ վեց մրցում պիտի կատարէ իր խմբակին մէջ: Չորս խմբակներէն գլխաւոր երկու դիրքերը գրաւող կազմերը պիտի անցնին երկրորդ փուլ:
Վիճակաձգութիւնը ուղիղ եթերով ցուցադրուեցաւ հեռատեսիլի LBC կայանէն:
ՀԵԸ Անդրանիկ Անթիլիաս ինկաւ Դ. խմբակին մէջ,որուն մաս կը կազմեն Շեպեպ Խըրայեպը, Պաալպեք Ռիատին եւ Ալ Ղարիան:
Շաբաթ, 2 Յուլիս 2022-ի յետմիջօրէին պաշտօնապէս մեկնարկեց Լիբանանի Մինի- ֆութպոլի Ա. դասակարգի ախոյեանութիւնը:
ՀԵԸ Անդրանիկ Անթիլիաս առաջին մրցումը կատարեց Ալ Ղարիայի դէմ, Պհամտունի մէջ: Մրցումը ընթացաւ մեր մարզիկներուն տիրապետութեան տակ եւ աւարտեցաւ՝ 4-3 ՀԵԸ Անդրանիկ Անթիլիասի յաղթանակով (կիսախաղ՝ 2-1, յօգուտ՝ ՀԵԸ Անդրանիկ Անթիլիասի):
ՀԵԸ Անդրանիկ Անթիլիասի մարզիչն է Ատէլ Ռըզքը, օգնական՝ Գօգօ Ալլոզեանը, վարիչ տնօրէնը՝ Ալեքս Առաքելեանը,իսկ ֆետերասիոնին մէջ ներկայացուցիչը՝ Թոնի Ճունթոյեանը (ֆետերասիոնի փոխնախագահ):
ՀԵԸ Անդրանիկ Անթիլիաս իր յաջորդ մրցումը պիտի կատարէ Ուրբաթ, 8 Յուլիս 2022-ին, Պաալպէքի մէջ, տեղւոյն կազմին դէմ:
Բարի երթ եւ նորանոր յաջողութիւններ կը մաղթեն ՀԵԸ Անդրանիկի մարզիկներուն եւ պատասխանատուներուն:
