Մինի Ֆութպոլ
Մինի ֆութպոլը համեմատաբար նոր մարզաձեւ մըն է ՀԲԸՄ-ՀԵԸ-ի մարզաձեւերով հարուստ ընտանիքին մէջ: Այսուհանդերձ, ՀԵԸ Անդրանիկ Անթիլիասի կազմը պատուաբեր արդիւնքներ արձանագրեց Լիբանանի այս տարուան բաժակի մրցումներուն: Մեր տղաքը բաժակի աւարտականին, նուազագոյն՝ 2-1 արդիւնքով զիջեցան իրենցմէ շատ աւելի փորձառու եւ արհեստավարժ լիբանանեան բանակի խումբին:
ՀԲԸՄ-ՀԵԸ Անդրանիկ մինի ֆութպոլի կազմը փայլուն յաղթանակներ արձանագրելով հասաւ բաժակի կիսաւարտականին եւ Ռիսելէ Ղազիէին՝ 4-1 արդիւնքով պարտութեան մատնելէ ետք՝ աւարտականին: Աւարտականին մեր մրցակիցն էր նախորդ տարուան բաժակակիր լիբանանեան բանակի խումբը:
Մեծ թիւով ՀԵԸ-ականներ դաշտ եկած էին քաջալերելու իրենց սիրելի խումբին, որոնց մէջ սկաուտներ, Ֆանֆարի կազմը եւ համակիրներ:
Մրցումը սկսաւ փոխադարձ յարձակումներով: Առաջին կիսախաղը վերջ գտաւ՝ 1-1 հաւասարութեամբ: Երկրորդ կիսախաղը դարձալ ընթացաւ հաւասար պայքարով եւ միայն մեր մարզիկներուն միջեւ անհասկացուղութիւն մը պատճառ դարձաւ, որպէսզի բանակը նշանակէ իր երկրորդ եւ յաղթանակի կոլը:
Կ’արժէ նշել, որ կիսաւարտականի եւ աւարտականի մրցումները տեղի ունեցան ՀԵԸ Անդրանիկի նորաստեղծ մարզադաշտին մէջ եւ ուղիղ հաղորդումով սփռուեցան Էլ. Պի. Սի. հեռատեսիլի կայանէն:
ՀԲԸՄ-ՀԵԸ-ի մարզասէրներուն անունով կը շնորհաւորենք լիբանանեան բանակի խումբը այս յաղթանակին առիթով:
Ճիշդ է, որ մեր մարզիկները ձեռնունայն դուրս վերադարձան դաշտէն, սակայն շահեցան լիբանանցի մինի ֆութպոլի սիրահարներուն համակրանքը:
ՀԵԸ Անդրանիկ Անթիլիասի կազմին գլխաւոր մարզիչն է Ատէլ Ռիզքը, օգնական ունենալով Գօգօ Ալլոզեանը: Խումբին վարչական պատասխանատուն է Ալեքս Առաքելեանը, իսկ Լիբանանի մինի ֆութպոլի ֆետերասիոնին մէջ մերներկայացուցիչն է փոխատենապետ Թոնի Ճունթոյեանը:
Լիբանանի մինի ֆութպոլի Ա. դասակարգի ախոյեանութիւնը պիտի սկսի Յունիսին:Ներկայիս մեր խումբը կը պատրաստուի Ռամատանի բաժակի մրցաշարքին: