Հայաստանի տեղական ինքնակառավարման մարմիններու ընտրութիւններու քուէարկութիւնները աւարտեցան։
Կենտրոնական ընտրական յանձնաժողովը երէկ յայտնեց, որ ընտրութիւններուն մասնակցած են ընտրելու իրաւունք ունեցող քաղաքացիներուն 42.48 տոկոսը։ Արդարեւ, 1 մլն 112 հազար 396 ընտրողներէն քուէարկութեանը մասնակցած են 472 528 քաղաքացի։
Ամենաաշխոյժ մասնակցութեամբ աչքի կ՛իյնայ Լոռիի մարզի Թումանեան համայնքը, ուր ընտրողներուն 69.78 տոկոսը մասնակցած է քուէարկութեան։ Ամենատկար մասնակցութեան տոկոսը ցուցաբերած է Արմաւիր քաղաքը, ուր գրանցուած է մասնակցութեան 20.73 տոկոս։
Սոյն ընտրութիւններուն ուշագրաւ այլ բանը այն էր, որ ՔՊ-ի ժողովրդականութիւնը բաւական նահանջ արձանագրած է հակառակ իր յարաբերական «յաղթանակներուն» կարգ մը շրջաններուն մէջ: ՔՊ-ի նահանջով ի յայտ եկան նոր ուժեր, որոնք փաստեցին, որ կարելի է յաջողութեան հասնիլ հակառակ իշխանութեան ունեցած առաւելութեան տուեալ ընտրութիւն մը ինք կազմակերպելու փաստով:
Արդարեւ այս ընտրութիւններով նոր ուժեր աչքի ինկան, ինչպէս «Զարթօնք» ազգային քրիստոնէական կուսակցութիւնը, որ մեծ յաջողութիւններ ձեռք ձգեց այն սահմանափակ շրջաններուն մէջ, ուր մասնակցեցաւ ընտրութիւններու: Սա ցուցանիշ մըն է, որ շատ բան կ՛ըսէ Հայաստանի ներքաղաքական կեանքի մէջ ուժերու վերադասաւորումի կարելիութիւններուն մասին: