Կ՛ակնկալուի, որ այսօր հացի գինի նոր ցուցակ մը յայտարարուի Լիբանանի Տնտեսութեան նախարարութեան կողմէ: Նշուեցաւ, որ անոր գինը մագլցում պիտի արձանագրէ վառելանիւթի գինի սղաճին արդիւնքով:
Աղքատութիւն ապրող լիբանանցին անօթութեան կրնայ դատապարտուիլ գնային նմանօրինակ մագլցումներով, որ անելի առջեւ դրած է մանաւանդ բազմազաւակ ընտանիքները, որոնց համար չոր հացն ալ այլեւս հասանելի չէ:
Ընկերատնտեսական այս ցաւալի վիճակը տակաւին չարգիլեր քաղաքական պատասխանատուներուն հրաժարելու իրենց անկուշտ ախորժակէն, որոնք այժմ զբաղած են նոր ընտրութիւններու պատրաստութեամբ, որուն համար ամէն ինչ պիտի ընեն իշխանութիւնը ձեռքէ չփախցնելու համար:
