Թագաժահրի վարակով պայմանաւորուած, Հ.Բ.Ը.Մ.ի Միշիկընի Ալեք եւ Մարի Մանուկեան վարժարանը 2020-2021 կրթական տարուայ նախապատրաստական աշխատանքները սկսաւ շարք մը հարցականներով:
Ամառուան ընթացքին Հոգաբարձուներու հերթական ու արտակարգ ժողովները, տնօրէնութեանց եւ ուսուցչական ամէնօրեայ պաշտօնական ու ոչ պաշտօնական հանդիպումները, ի վերջոյ եկան այն եզրակացութեան, որ վարժարանս պէտք է ապահովեր առցանց, ինչպէս նաեւ դպրոցաշէնքէն ներս մատուցուող դասաւանդութիւններ: Ահա այստեղ կը սկսէր տնօրէն դոկտ. Յովսէփ Թորոսեանի, ինչպէս նաեւ դպրոցի պաշտօնէութեան կազմակերպչական եռուն աշխատանքը՝ դասացուցակներու ճշդում, աշակերտական խումբերու բաժանում, դասագիրքերու եւ բոլոր առարկաներու ծրագիրներու առցանց տրամադրելիութիւն: Այս ծիրէն ներս, Հայկական բաժանմունքն ալ, գլխաւորութեամբ բաժնի պատասխանատու Պրն. Սեպուհ Աւետիքեանին, Հայերէն լեզուի դասագիրքերն ու պատմութեան ու գրականութեան նիւթերը PDF ձեւաչափով տրամադրելի դարձուց վարժարանիս որդեգրած Microsoft Teams ծրագիրէն ներս:
Եւ ահա Սեպտեմբեր 7-ին դպրոցը պատրաստ էր մանկամսուրէն 12-րդ դասարանի աւելի քան 400 աշակերտներուն մատուցելու առցանց կամ դպրոցաշէնքէն ներս տարուող դասաւանդութիւնները: Այս յաջող մեկնարկը տեւեց մինչեւ Նոր Տարուայ արձակուրդ, երբ Միշիկընի մէջ Թագաժահրով վարակուողներուն թիւերը սկսան բարձրանալ: Միշիկընի միւս վարժարաններուն նման, Մանուկեան վարժարանն ալ որոշեց դպրոցաշէնքը փակ պահել մինչեւ երկրորդ կիսամեակ՝ այսինքն Փետրուար ամիս. մինչ այդ դարձեալ բոլոր դասաւանդութիւնները կատարուեցան առցանց:
Հակառակ Թագաժահրի ստեղծած այս բոլոր դժուարութիւններուն, Մանուկեան վարժարանի աւարտական դասարանի աշակերտներուն այս տարուայ յաջողութիւնները գլեց անցաւ ամէն սպասելիքները: Այսպէս, Մարտ ամիսէն սկսեալ աշակերտներուն համալսարան ընդունուելու ծանուցագիրները կը հասնէին, ուրախացնելով անոնց ծնողները, ուսուցիչներն ու յատկապէս երկրորդական վարժարանի տնօրէն Դոկտ. Յովսէփ Թորոսեանը: Այս տարուայ 33 աւարտականներէն 31-ը ընդունուեր էին Միշիկընի տարբեր համալսարաններ: Գրեթէ բոլոր համալսարան ընդունողները կրթանպաստներ ստացեր էին: Ստացուած կրթանպաստներուն ընդհանուր գումարը աւելի քան 2.5 միլիոն տոլար էր: Ութը աշակերտներ ընդունուեր էին Միշիկընի հեղինակաւոր Էնն Արպըր համալսարանը: Նկատի ունենալով անոնց կրթական բարձր մակարդակն ու պետական քննութիւններուն ստացած բարձր թուանշանները, Էնն Արպըր համալսարանի տնօրէնութիւնը ութին ալ տրամադրեր էր չորս տարուայ լման կրթանպաստներ:
Այսքանը կարծէք չէր բաւեր եւ ահա Ապրիլի կէսէրուն, դասարանի լաւագոյն աշակերտուհի Եուլիա Վելհանը կը ստանար հեղինակաւոր համալսարաններու Ivy League–ի անդամ, Րոտ Այլընտ նահանգի համալսարաններէն Brown University-էն ընդունման ծանուցագիր: Համալսարանը յանձն առեր էր Եուլիային չորս տարուայ բոլոր ծախսերը հոգալ՝ ներառեալ ուտելիքը, դասագիրքերն ու կեցութիւնը:
Եուլիային ծնողքը Ուքրանիայէն Միշիկըն փոխադրուեր էր եօթը տարի առաջ: Լսելով Մանուկեան վարժարանի յաջողութիւններուն մասին, անոնք անգլերէն բնաւ չիմացող փոքրիկ Եուլիային վստահեր էին վարժարանիս ուսուցիչներուն: Եուլիան քանի մը տարուայ մէջ ոչ միայն անգլերէնին սահուն տիրապետեր էր, այլ նաեւ սորվեր էր հայերէն լեզու, հայոց պատմութիւն, հայ մշակոյթ ու հայ գրականութիւն: Անոր սիրած վէպը Ամերիկահայ գրող Նէնսի Գրիգորեանի «Զապէլ» գործն էր, իսկ սիրած պատմուածքը՝ Վահան Թոթովենցի «Բաց կապոյտ ծաղիկներ»-ը (անգլերէն թարգմանութեամբ՝ “Pale blue flowers”):
Աւարտական դասարանի միւս երեք valedictorian-ները՝ Դաւիթ Թոգմաճեանը, Գարին Գալուքեանը եւ Էլէյն Ազարը բոլորն ալ լման կրթանպաստներով ընդունուելով Էնն Արպըրի Միշիկընի համալսարան, կը խոստանային շարունակել իրենց նախորդներուն բարի համբաւը, բարձր պահելով Մանուկեան վարժարանի պատիւը: Անոնք պիտի համալրէին Էնն Արպըր համալսարանի հեղինակաւոր հայկական ուսանողական ակումբին շարքերը, վստահաբար ապագային այնտեղ կազմակերպելով հայանպաստ ձեռնարկներ:
Աւարտական դասարանի աշակերտները այժմ անհամբեր կը սպասեն տարեվերջի վկայականներու բաշխման հանդէսին, որ տեղի պիտի ունենայ Երկուշաբթի, Յունիս 7, 2021-ին. սակայն այս մասին՝ յաջորդիւ:
