«ԶԱՐԹՕՆՔ», ՊԷՅՐՈՒԹ – Մարի Աթմաճեան (19 Մարտ 1901, Արեւմտեան Հայաստան, Պաֆրա – 13 Յունիս 1975, Փարիզ), սփիւռքահայ բանաստեղծուհի, գրական եւ հասարակական գործիչ, բանաստեղծ Սեմայի քոյրը։
Ծնած է Պաֆրա։ Քոյրն է տարաբախտ բանաստեղծ ու գրագէտ Ա. Սեմայի։ 1915-ի եղեռնին Աղաճա Գշլայի մէջ, ուր աքսորուած էին ընտանեօք, կ’ենթարկուին անլուր տանջանքներու։ Հայրը խենեշօրէն կը սպանուի։ Գաղթականութիւն ու զրկանք կ’ըլլայ բաժինը իրենց կեանքին։ Պոլիս, Սուրիա, Եթովպիա, Յունաստան եւ Ֆրանսա…
Դպրոցական Կեանք
Կ’աշակերտէ Պոլսոյ Դպրոցասէր տիկնանց վարժարանին։ Գրականութեան իր ուսուցիչը եղած է Չօպանեան։ Գրական նախափորձերը կը հրատարակուին Ա. Սեմայի «Ջանք» եւ «Մշակոյթ» ամսագիրներուն մէջ։