«ԶԱՐԹՕՆՔ», ՊԷՅՐՈՒԹ –Ֆրանսայի նախագահ Էմանուէլ Մաքրոն, Ծիծեռնակաբերդի մէջ Հայոց Ցեղասպանութեան զոհերու յիշատակին յարգանքի տուրք մատուցելէ ետք՝ շրջած է թանգարանէն ներս եւ գրութիւն ձգած պատուաւոր հիւրերու յուշամատեանին մէջ: Այս մասին կը հաղորդէ Armenpress.am-ը։
«Ծանր ապրումներով ու յուզմունքով այստեղ ենք այսօր: Ֆրանսայի անունով յարգանքի տուրք կը մատուցանեմ բոլոր անոնց, որոնք ինկան՝ «արեւը առած իրենց աչքերուն մէջ», անոնք, որոնք՝ «միայն ապրիլ կ՝ուզէին»: Ֆրանսան քօղազերծած է ցեղասպանութիւնը դեռ 1915-ին՝ մտաւորականներու կողմէ: Եւ ան ընդունած է երեխաներն ու ընտանիքները, որոնք կը փախչէին ցեղասպանութենէն, եւ որոնք մեր ազգը աւելի պանծացուցին:
Ֆրանսան երբեք չի մոռնան եւ կը պայքարի ճշմարտութեան ու ճանաչման համար:
Այս տխուր խոնարհումը անոնց համար, որոնք ինկան: Մեր եւ գալիք սերունդներու համար»,-նշուած է Մաքրոնի գրութեան մէջ:
Նշենք, որ Ֆրանսայի նախագահ Էմանուէլ Մաքրոն, իր տիկնոջ` Պրիճիթ Մաքրոնի հետ, Երեւան ժամանած էր Ֆրանսախօս երկիրներու գագաթնաժողովին մասնակցելու համար:
