Աշխարհի ամենաբարձր գագաթը` Էվերեսթը նուաճած մարսէլաբնակ հայազգի լեռնագնաց Արա Խաչատուրեանը, որ Ապրիլէն Մարսէլէն ծրագրած էր վազքով հասնիլ Հայաստան, Յուլիս 18-ին ժամանած է Կիւմրի: Վազորդին դիմաւորած են Շիրակի մարզպետ Կարէն Սարուխանեան, մարզպետի տեղակալներն ու Կիւմրիի քաղաքապետ Սամուէլ Բալասանեանը:
Մարզպետն ու քաղաքապետը ողջունած են հիւրը, զրուցած անոր հետ անցած ճանապարհի դժուարութիւններուն մասին եւ հետագայ յաջողութիւններ եւ նորանոր բարձրունքներ մաղթած են անոր:
Օրական վազելով 50 քմ Արա Խաչատուրեան Յուլիս 21-ին իր խաղաղութեան մարաթոնը պիտի եզրափակէ Երեւանի Հանրապետութեան հրապարակին վրայ:
«Ցանկացայ վազել յանուն խաղաղութեան եւ կոչ ուղղել, որ որեւէ տեղ պատերազմ չըլլայ: Նպատակս է նաեւ երիտասարդներուն ըսել՝ եթէ նպատակ, երազանք ունիք, ձգտելով կրնաք հասնիլ ատոր»,- լրագրողներուն հետ զրոյցին նշած է Արան:
Նշենք,որ 53 ամեայ Արա Խաչատուրեանը վազքը սկսած է մօտ երեք ամիս առաջ, օրական վազքով կտրած է 50 քմ` անցնելով 8 երկիր եւ 150 քաղաք:
Արա խաչատուրեան մագլցած է աշխարհի ամենաբարձր ութ գագաթները`
Մոնպլան, Ֆրանսա – 4.807մ (2007),
Արարատ, Արեւմտեան Հայաստան- 5.137մ (2011),
Գիլիմանջարօ, Ափրիկէ- 5.896մ (2012),
Քոտոպաքս, Էքուատոր- 5.897մ (2013),
Սահամա, Պոլիւիա- 6.542մ (2013),
Հուասկարան, Փերու- 6.655մ (2013),
Լենին, Ղրղզստան- 7.134մ (2016),
Էվերեսթ, Նեպալ – 8.848մ (2016):
