Քուէյթի հեղինակաւոր «Kuwait Times» անգլիագիր պարբերականը «Ancient Amenian Cuisine» (Հինաւուրց Հայկական խոհանոցը) խորագիրով անդրադարձած է հայկական խոհանոցին։ Այս մասին կը կարդանք Լիլիթ Գալստեանի դիմատետրի էջէն։
Պարբերականին մէջ ներկայացուած է հայկական Տոլման (ամառնային ու խաղողի տերեւով), ինչպէս նաեւ Գաթան։
Լիլիթ Գալստեան, պարբերականի հետ զրոյցին ընթացքին հպարտութեամբ անդրադարձած է նաեւ Հայաստանի հնադարեայ աւանդոյթներուն ու հիւրընկալութեան, խօսած է Լաւաշը UNESCO-ի ոչ նիւթական մշակութային ժառանգութեան ցանկին մէջ ներառուած ըլլալուն մասին, ու շեշտած, որ ներկայացուածը տակաւին ամբողջական չէ, եւ թէ պէտք է այցելել Հայաստան։
«Կը մտածեմ, մեր Գաթան ալ արժանի է UNESCO-ի ոչ նիւթական մշակութային ժառանգութեան ցանկին մէջ ներգրաւելու»,- իր խօսքը աւարտած է Լիլիթ Գալստեան՝ նշելով, որ այդ մասին պէտք է յիշեցնել ՀՀ մշակոյթի նախարար Լիլիթ Մակունցին:
