Շաբաթ, 20. 07. 2024

spot_img

Լրագրողներու Համահայկական 9րդ Համաժողովը Կը Շարունակուի

Հինգշաբթի 31 Մայիսին ՀՀ սփիւռքի նախարարութեան մէջ 5-րդ եւ 6-րդ նիստերով աշխատանքները շարունակեց Լրագրողներու համահայկական 9-րդ համաժողովը:

Հինգերորդ նիստի նիստավարներն էին «Օրեր» ամսագիրի գլխաւոր խմբագիր Յակոբ Ասատրեանը (Չեխիա) եւ «ՀայՏեղեկատուաԿեդրոն» տեղեկատուական-վերլուծական կեդրոնի ղեկավար Արմէն Տէր Սարգսեանը (Ռուսաստան):

«Ժամ» ամսագիրի գլխաւոր խմբագիր Աննա Կիվարկիզեանը (Ռուսաստան) հանդէս եկաւ  «Մամուլ եւ պետականութիւն. պատմութիւն, օրինաչափութիւններ, միտումներ» զեկուցումով:

«Հորիզոն» շաբաթաթերթի գլխաւոր խմբագիր Վահագն Գարագաշեանը (Գանատա) զեկուցեց  Հայաստանի եւ Սփիւռքի մէջ հայկական մամուլի խնդիրներուն վերաբերեալ՝ ներկայացնելով տեղեկատուական պատերազմներու, ապատեղեկատուութեան դէմ պայքարի մարտահրաւէրները:

«Զարթօնք» օրաթերթի գլխաւոր խմբագիր Սեւակ Յակոբեանը (Լիբանան) ներկայացուց «Դէպի 2050` հայկական մամուլի լեզուական հարցն ու ընթերցողներու թիւի նօսրացումը. խնդիրներ եւ լուծումներու առաջարկներ» զեկուցումը: Սեւակ Յակոբեան շեշտադրեց աւանդական լրատուամիջոցներու առջեւ ծառացած սպառնալիքները, երբ տպագիր մամուլը մեծ թափով կը նահանջէ: «Քանի դեռ մէկ ընթերցող կայ, տպագիր մամուլը կը գոյատեւէ»,- նշեց «Զարթօնք»-ի խմբագիրը եւ աւելցուց, որ Սփիւռքի լրատուամիջոցները ե՛ւ հայալեզու ընթերոցողի խնդիր ունին, ե՛ւ հայալեզու աշխատակիցներու:

Այս ուղղութեամբ ընկ. Յակոբեան շեշտեց ըսելով. «Ամէն պարագայի, ապագայի մամուլի տպագիր թէ ելեկտրոնային ըլլալը չէ նպատակակէտը, այլ մեր պարագային անոր հայկականութիւնն է մեր հիմնախնդիրը ու ահա այս ճակատին վրայ է, որ պէտք է կռուիլ: Հայկական տպագիրն ու ելեկտրոնայինը միատեղ կը դիմագրաւեն նոյն խնդիրը՝ հայերէնի իմացութեան խնդիրը թէ՛ աշխատողի եւ թէ՛ ընթերցողի պարագային: Ահաւասիկ այս է հիմնախնդիրը այսօր: Այս ճակատն է լրջօրէն վտանգուածը եւ ես ամենեւին վստահ չեմ, թէ մենք՝ հայ լրագրողներս ու խմբագիրներս, ի՛նչ կ’ընենք այս ուղղութեամբ…: Եթէ ընթերցող պիտի չունենանք, ապա խնդիրը տպագիր կամ ելեկտրոնայինէն շատ անդին է:

Այստեղ տգեղ հորիզոնական մը ստեղծելու գնով պիտի համեմատեմ հայ դպրոցի պարագան հայ թերթին կամ լրատուամիջոցին հետ: Ատենին երբ հայ աշակերտութեան թիւը տակաւին կրնար պահել տնօրէնն ու ուսուցչական կազմը եւ, անշո՛ւշտ, դպրոցին պատասխանատուները, ո՛չ մէկը օտար վարժարան յաճախելու երեւոյթը սերտելով զբաղած էր, յանկարծ այսօր երբ անոնց գործը վտանգուեցաւ ու տնօրինած վարժարանը փակուելու սեմին է, անոնք սկսան այս երեւոյթը քննարկել: Մեր պարագային, սիրելինե՛ր, եկէ՛ք օրինակ քաղենք վերի երեւոյթէն եւ խնդիրներու լուծման մասին այսօրուընէ մտածենք: 2050-ի հայ մամուլի հիմնախնդիրը արհեստագիտութեան չի վերաբերիր, այլ լեզուին ու հայերէն լեզուով գրողներու ընթերցողներու նօսրացումին:

Այս հարցին լուծումի որոնումները այլեւս սոսկ ողջմտութեամբ (common sense) չ’ըլլար, այլ գիտական մօտեցումով ու համակարգային մաշտապի աշխատելաձեւով: Խնդիրը մեր այս կամ այն թերթին չի վերաբերիր այլեւս, այլ ազգին՝ իր բոլոր բաղկացուցիչներով ու համակարգերով: Եկէ՛ք ասոր մասին մտածենք: Մտածենք ի՛նչպէս միասին աշխատինք եւ ուսկից սկսինք: Եկէ՛ք աւարտին միասին քննարկենք ասոր լուծումին մասին: Ես չեմ կրնար ու չեմ ուզեր այս զեկոյցով լուծումներու մասին խօսիլ կամ գաղափարներ պարտադրել»:

«Եկէ՛ք միասնաբար եւ մշտական հանդիպումներով պրէյն սթորմինկը ընենք՝ հիմնուելով երեւոյթը ուսումնասիրող աշխատասիրութիւններու վրայ,  որպէսզի միասին եւ հաւաքական պատասխանատուութեամբ լուծումներու յանգինք ու մանաւանդ ձեռնարկենք այդ գաղափարներուն գործնականացումը, քանի դեռ ուշ չէ: Ո՞ւշ է…»,- եզրափակեց Յակոբեան:

«Նոր դարաշրջան» թերթի գլխաւոր խմբագիր Էտուարտօ Նեսթոր Պալեան (Արժաթինա) խօսեցաւ Թուրքիոյ` հայ ժողովուրդին դէմ իրականացուցած ցեղասպանութեան ժխտողականութեան մէջ մամուլի դերին եւ կարեւորութեան մասին:

 «Սարդարապատ» շաբաթաթերթի գլխաւոր խմբագիր Տիանա Տէր Կարապետեանը (Արժանթինա) հանդէս եկաւ «Արժանթինահայ մամուլի հիմնախնդիրները» թեմայով զեկուցմամբ: Ան նշեց, որ արժանթինահայ լրատուամիջոցներուն մէջ սակաւաթիւ են երիտասարդ լրագրողները, եւ կախուած հասարակական պահանջէն, հիմնաւորապէս փոխուած է լուրը հաղորդելու, տեղեկութիւնը փոխանցելու ձեւը:

«Միաբան» տեղեկատուական գործակալութեան ղեկավար Վահան Բաբախանեանը (Ռուսաստան) ներկայացուց «Միաբան» նախագիծը, անդրադարձաւ մամուլի կողմէ հայանպաստ լոպիինկի անհրաժեշտութեան:

Արցախի Լրագրողներու միութեան նախագահ Քիմ Գաբրիէլեանը իր ելոյթին ընթացքին նշեց, որ Արցախի մէջ առկայ է լրագրողական մեծ ներուժ, եւ սփիւռքեան որոշ լրատուամիջոցներ ունին արցախեան թղթակիցներ:

ՀԲԸՄ Հայաստանի տնօրէն Դալար Գազանճեանը ներկայացուց Հայաստանի բարեփոխումներն ու սփիւռքի ներգրաւման գործին մէջ լրատուամիջոցներու դերը:

Հինգերորդ նիստի աւարտին տեղի ունեցաւ քննարկում, հնչեցին յաւելեալ ելոյթներ: Մասնաւորապէս գրող, հրապարակախօս Յակոբ Պալեանը ընդգծեց, որ հայրենադարձութեան հարցը  պէտք է դառնայ սփիւռքահայ մամուլի հիմնական թեման:

Համաժողովի «ՀՀ սփիւռքի նախարարութեան առաջնահերթութիւնները» խորագրով 6-րդ նիստի նիստավարներն էին Սփիւռքի նախարարի տեղակալ Բաբգէն Տէր Գրիգորեանը, «Արարատ» օրաթերթի գլխաւոր խմբագիր Անի Եփրեմեանը (Լիբանան), «Սարդարապատ» շաբաթաթերթի գլխաւոր խմբագիր Տիանա Տէր Կարապետեանը  (Արժանթինա), «Հորիզոն» շաբաթաթերթի գլխաւոր խմբագիր Վահագն Գարագաշեանը (Գանատա):

«Արաքս» շաբաթաթերթի գլխաւոր խմբագիր Մովսէս Քէշիշեանը (Իրան) հանդէս եկաւ «ՀՀ սփիւռքի նախարարութեան առաջնահերթութիւնները, Այո-ն եւ Ոչ-ը» թեմայով զեկուցումով:

«Լուսաւոր Աւետիս» լրատուական կայքի թղթակից Տիգրան Փաշաբեզեանը (Ֆրանսիա) առաջարկեց համաժողովի աւարտին Սփիւռքի նախարարութեան ներկայացնել առաջարկութիւններու համապարփակ փաթեթ:

«Եռագոյն» եւ «Հայկաշխարհ» կայքերու համահիմնադիր Նայիրի Մկրտչեանը յորդորեց նախարարութեան նորանշանակ ղեկավարութեան յեղափոխութեան սէրն ու համերաշխութիւնը վերածել արդիւնաւէտ աշխատանքի:

«Հակակացին» ծրագիրի ներկայացուցիչ Վատիմ Յարութիւնովը (Ռուսաստան) ներկայացուց Ազրպէյճանի կողմէ Ռուսատանի մէջ իրականացուող հակահայկական քարոզչութեան դէմ պայքարի իրենց փորձը:

Հայրենադարձութեան գործընթացի եւ անոր լուսաբանման առանձնայատկութիւններու մասին խօսեցան Լրատուամիջոցներու համահայկական ընկերակցութեան փոխնախագահ Գայանէ Առաքելեանը, «Խօսնակ» ամսագիրի գլխաւոր խմբագիր Համբիկ Մարտիրոսեանը (Լիբանան), «Ազդակ» թերթի գլխաւոր խմբագիր Շահան Գանտահարեանը (Լիբանան):

Ելոյթներով հանդէս եկան նաեւ ներկայ շարք մը լրագրողներ:

Համաժողովը կը շարունակուի եւ կ՛եզրափակուի Ուրբաթ 1 Յունիս 2018-ին:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին