Շաբաթ, 13. 07. 2024

spot_img

Երեւանի Պետական Համալսարան – ՀՀԻ Պատուիրակութիւնը Կ’աւարտէ Աշխատանքային Շաբաթը՝ Նոր Ծրագիրներով Վերազինուած

*ՍՈՆԱ ԱԲՈՒՆՑ*
ԵՊՀ լրագրութեան բաժնի
2-րդ դասընթացքի ուսանողուհի

ԵՊՀ Հայագիտական հետազօտութիւններու հիմնարկի պատուիրակութեան աշխատանքային մէկ շաբթուան այցը Լիբանան իր աւարտին կը մօտենայ: Յագեցած ըլլալով աշխատանքային բազում ծրագիրներով՝ պատուիրակութիւնը հասցուցած է ըլլալ համայնքի գործող 6 վարժարաններուն մէջ (Հայ Աւետարանական կեդրոնական բարձրագոյն վարժարան, Ազգային Միացեալ վարժարան, Հայ կաթողիկէ Ս. Խաչ Հարպոյեան վարժարան, Հայ Աւետարանչական գոլէճ, Համազգայինի Մելանքթոն եւ Հայկ Արսլանեան Ճեմարան, Մեսրոպեան վարժարան), հանդէս գալ դասախօսութիւններով, զեկուցումներով, մասնակցիլ կլոր-սեղան քննարկումներու: Այս այցերը օգտաշատ էին ոչ միայն վերոնշեալ կէտերով, այլեւ համագործակցութեան պայմանագիրերու կնքումով: Երեւանի Պետական համալսարանի՝ Լիբանանի գործընկեր վարժարաններու թիւին աւելցան 3 վարժարաններ եւս:


Աշխատանքային վերջին օրը նոյնպէս աշխատանքային յագեցած ծրագիրներով ընթացաւ:

Ապրիլ 27-ին՝ գործուղղման վերջին օրը, պատուիրակութիւնը համագործակցութեան քննարկումներ ունեցաւ Համազգայինի Մելանքթոն եւ Հայկ Արսլանեան ճեմարանին ու Մեսրոպեան վարժարանին մէջ: Հանդիպումներ տեղի ունեցան ճեմարանի եւ վարժարանի տնօրինութեան, հայոց լեզուի, գրականութեան, հայոց պատմութեան ուսուցիչներուն հետ: Քննարկուեցան գործակցային, դասաւանդման եղանակի, ուսուցչական կազմի վերապատրաստման ուղղուած հարցեր: Ուսանողները շրջեցան ճեմարանը, հանդիպեցան աշակերտութեան հետ, պատասխանեցին անոնց յուզող հարցերուն, որոնք հիմնականը կը վերաբերէին Հայաստանի մէջ բարձրագոյն կրթութեան իրականացման, հնարաւորութիւններուն ու խնդիրներուն: Հայոց Ցեղասպանութեան հիմնահարցերուն շուրջ դասաւանդում իրականացաւ  Մեսրոպեան վարժարանի երկու եօթներորդ եւ երկու ութերորդ դասարաններուն մէջ։ Համալսարանի առաջին գործընկեր վարժարանին մէջ, ինչպէս միւս նախորդներուն, «Ցեղասպանագիտութիւն» մագիստրոսական ծրագիրի ուսանողները սրտացաւ ու պատասխանատու կերպով կը փորձէին հնարաւորինս պարզ ներկայացնել խնդիրը, ծաւալել ընդգրկուն քննարկում։ Ասիկա ծրագիրի ծիրէն ներս նախատեսուած վերջին դասաւանդումն էր: Փորձելով ընդհանրացնել շաբթուան դասաւանդումներէն ստացած տպաւորութիւնները՝ ցեղասպանագէտներէն Նելլի Աբրահամեանը կը նշէ, որ շատ տպաւորուած է, եւ ակնկալիքները սպասուածէն աւելի էին: «Խորքին մէջ, ամէն ինչ աւելի լաւ ընթացաւ, քան կ’ակնկալէի: Աշակերտներու հետաքրքրուածութիւնը շատ մեծ էր: Հետաքրքրութիւնը ոչ միայն բուն Հայոց Ցեղասպանութեան մասին, այլեւ աշխարհաքաղաքական ընդհանուր իրավիճակին, թէ ինչո՛ւ Հայոց Ցեղասպանութիւնը պաշտօնապէս չի ճաչցուիր, եւ, ի միջի այլոց, ըսեմ, որ բաւական տեղեակ էին պատճառներէն»: Աշակերտներու հնչեցուցած բազմաթիւ հարցերէն Նելլիին տպաւորած է այն հարցը, թէ ճի՛շդ է արդեօք, որ Հայաստանը դրախտավայր է: «Յուզական էին աշակերտները, եւ այդ յուզական մակարդակին վրայ բոլորին մօտ կար հողերը վերադարձնելու, արդարութիւնը վերականգնելու, Թուրքիոյ, այսպէս ըսած, իր տեղը դնելու ցանկութիւն»:

«Լիբանանի մէջ Հայոց Ցեղասպանութենէն փրկուածներու սերունդներուն դասաւանդելը, իրենց կարծիքներուն, գնահատականներուն ծանօթանալը, անշո՛ւշտ, կարեւոր կը համարեմ: Զիս յատկապէս հետաքրքրեց իմ մէկ հարցումիս ստացած պատասխանս, թէ իրենք ի՛նչպէս կը պատկերացնեն Հայոց Ցեղապանութեան վերջնական հանգուցալուծումը, որուն պատասխանեցին՝ Հայաստան-Սփիւռք միասնականութեամբ եւ ՀՀ տնտեսական, քաղաքական հզօրութեամբ»,- կը նշէ Մերի Գէորգեանը: Ցեղասպանագէտները շատ ոգեւորուած էին, երբ զանգը հնչելէ ետք աշակերտները կը ցանկային յաւելեալ դասաժամ տրամադրել այս հարցերուն: Այսպիսով,  շաբթուան արդիւնաւէտութիւնը նոր ծրագիրներով ու հեռանկարներուն զիրենք նորէն կը մղէ Լիբանանի  հայկական կրթօճախներ: Աւելցնենք, որ օրը ամփոփուեցաւ Մհեր Յովհաննիսեանի ու Սեպուհ Գալպաքեանի գլխաւորութեամբ ՍԴՀԿ Լիբանանի վարիչ մարմինի միջեւ կայացած հանդիպումով։ Յովհաննիսեանը ներկայացուց վերջին տարիներուն Լիբանանի մէջ իրենց կողմէ կատարուած աշխատանքները, որուն յաջորդած քննարկումին արդիւնքով նախանշուեցան համայնքին մէջ գործակցելու հաւանական ուղղութիւնները։ Հուսկ, նշենք, որ Պէյրութի Ամերիկեան համալսարանին մէջ պատուիրակութիւնը կը մասնակցէր Թաներ Աքճամի դասախօսութեան, որուն կ’անդրադառնանք յաջորդիւ։

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին