«Sunmag» ռուսական հանդէսը խորհուրդ կու տայ իր հայրենակիցներուն օգտուիլ մայիսեան տօներէն եւ հանգիստը անցընել այնտեղ, ուր գարնան կիսուն եղանակը տաք է, ուտելիքը համեղ, իսկ գիները մատչելի: Որպէս ճամբորդութեան ուղղութիւն փորթուկալական Ալկարուէի, իսրայէլեան Թել Աւիւի, մոլտովական Քիշնեւի, աւստրիական Ինսպրուկի եւ Մարոքքոյի Մարաքեշի հետ մէկտեղ նշուած է նաեւ Երեւանը:
Յօդուածին հեղինակ Իրինա Շչափովան որպէս յաւելեալ առաւելութիւն ռուս զբօսաշրջիկներուն համար կը նշէ, որ Հայաստան կարելի է մեկնել նոյնիսկ ներքին ռուսական անձնագիրով: «Եթէ արտասահմանեան անձնագիր ինչ-ինչ պատճառներով չունիք, միեւնոյն է` Արարատըպատրաստ է ընդունելու ձեզ իր գիրկը»,– կ’ըսուի «Sunmag»-ի հրապարակած յօդուածին մէջ:
«Երեւանը աշխարհի հնագոյն քաղաքներէն մէկն է, անիկա հիմնուած է դեռ մեր թուարկութենէն առաջ, ուստի պատմամշակութային վայրերու պակաս չկայ` հին եկեղեցիներ ու վանքեր կան ինչպէս քաղաքի կեդրոնին, այնպէս ալ արուարձաններու` զմրուխտէ բլուրներու ֆոնին»,- կը գրէ հեղինակը:
Ան խորհուրդ կու տայ նախապէս ծրագրել, թէ բնութեան գիրկը ըլլալու համար որ ուղղութիւնը նախընտրելի է` Սեւանայ լիճը, Տաթեւի վանքը թէ Արարատի ստորոտը, ուր նոյնիսկ կարելի է օդապարիկ նստիլ:
«Հակառակ պարագային երեւանեան խորովածներն ու քոնեակը կը գրաւեն ձեր ամբողջ ուշադրութիւնը»,- կ’ըսուի յօդուածին մէջ:
