Alphabet Inc. holding-ը, ուր ընդգրկուած է նաեւ Google-ը, դարձած է ամենաթանկարժէք ընկերութիւնը աշխարհի մէջ` առաջ անցնելով Apple ընկերութենէն, կը հաղորդէ Tert.am-ը վկայակոչոլով BBC-ն:
Ֆինանսական տարուան չորրորդ եռամսեակի մասին զեկոյցի հրապարակումէն ետք, Alphabet-ի բաժնետոմսերը վաճառքներու փակումէն յետոյ աւելցած են 9%-ով:
Այդպիսով ընկերութեան արժէքը աւելցած է մինչեւ 568 միլիառ տոլար, մինչդեռ Apple-ը կը գնահատուի 535 միլիառ տոլար:
Կը նշուի, որ աշխարհի ամենաթանկ ընկերութեան դրօշակը արդէն քանի մը տասնամեակ կը պատկանի ամերիկեան արուեստագիտական ձեռնարկութիւններուն: Apple ընկերութիւնը կը պահպանէր աշխարհի ամենաթանկ ընկերութեան կոչումը 2010-էն սկսեալ, երբ առաջին տեղէն դուրս մղեց Microsoft ընկերութիւնը, որ իր հերթին 20 տարի առաջ առաջ անցած էր IBM-էն:
