App Store-ի վրայ արդէն հասանելի է Haybuben բջիջային յաւելուածը, որ կ՝օգնէ Սփիւռքի մէջ ապրող հայ մանուկներուն սորվելու մայրենի լեզուն: Այս մասին կը հաղորդէ «Եռագոյն» կայքը:
Haybuben-ը ելեկտրոնային ուսուցողական ծրագիր է, որ նախատեսուած է Սփիւռքի փոքրիկներուն սորվեցնելու արեւմտահայերէնի հիմունքները: Ծրագիրը կ՝օգնէ փոքրիկներուն իւրացնելու այբուբենը ինքնուրոյն` առանց մեծերու օգնութեան:
Խաղը բաղկացած է երեք մասէ: Առաջինը կը ներկայացնէ այբուբենը, երկրորդը կ՝օգնէ յիշել տառերը, իսկ երրորդը կը սորվեցնէ բառեր կազմել:
Յաւելուածը ստեղծուած է IOS համակարգին համար եւ համադրելի է IOS 7 կամ աւելի բարձր տարբերակներու հետ: Խաղը նախատեսուած է ե՛ւ Iphone-ի, եւ Ipad-ի համար:
Haybuben-ը հասանելի է App Store-ի վրայ անվճար:
Ծրագիրը ստեղծուած է Mediapolis ընկերութեան կողմէ (Երեւան), Գալուստ Կիւլպէնկեան հիմնարկի նիւթական միջոցներով, հայաստանցի եւ հայրենադարձ արեւմտահայերէնի մասնագէտներու գործակցութեամբ:
«Զարթօնք»ի կողմէ շնորհաւորելով հեղինակներուն ազնիւ գործը, շինիչ քննադատութեամբ կ՛ուզենք մատնանշել, թէ արեւմտահայերէն սորվեցնող ծրագիր մը ինչո՞ւ պէտք է գրուի Haybuben (զոր սփիւռքահայ փոքրիկը ակամայ պիտի կարդայ Հէյպուպէն), փոխան զայն գրելու արեւմտահայերէնի հնչիւնաբանութեամբ` Hyepoupen ։
