Վերջին տարիներու պատերազմական գործողութիւններու պատճառով` Սուրիոյ քրիստոնեայ բնակչութեան (որոնց շարքին տոկոսային աւելի կամ նուազ չափով նաեւ Սուրիահայութեան) գրեթէ կէսը գաղթած է երկրէն:
«Օգնութիւն աղէտեալ եկեղեցիներուն» միջազգային բարեգործական կազմակերպութեան ներկայացուցիչ Ճոն Նիւթոնի խօսքերով` մօտ 700 հազար քրիստոնեայ ստիպուած եղած է հեռանալու երկրէն, Ինթերֆաքս-ի փոխանցմամբ կը գրէ The Christian Post կայքը:
«Սուրիոյ մէջ 1,75 մլն քրիստոնեայ կ’ապրէր մինչ պատերազմը: Ատիկա կը նշանակէ, որ սուրիացի քրիստոնեաներու մօտ 40%ը մեկնած է», յայտարարած է ան:
Մասնաւորաբար քրիստոնեաներով բնակեցուած Մաալուլա գիւղին մէջ, նախկին 3 հազար բնակիչներէն մնացած է միայն քանի մը հարիւրը: Այս գիւղին մէջ կը գտնուին հնագոյն քրիստոնէական եկեղեցիները, իսկ անոր բնակիչները կը խօսին գրեթէ անհետացած արամերէնով, որմով խօսած է Յիսուսը: 2013ին գրոհայինները գերեվարած էին տեղի վանքի վանական քոյրերը, որոնք յետոյ ազատ արձակուեցան:
Ըստ Նիւթոնի Իրաքի մէջ մօտ 120 հազար քրիստոնեաներ հեռացած են իրենց տուներէն, որոնցմէ շատերը մեկնած են երկրէն:
