Աւանդոյթի համաձայն` գործարար ոլորտի ամենայայտնի Forbes ամսագիրը հրապարակած է աշխարհի ամենահարուստ մարդոց 2015 թուականի ցուցակը: Ինչպէս կը հաղորդէ «Արմէնփրես»-ը` վկայակոչելով ամսագրի պաշտօնական կայքը, ինչպէս նախորդ տարիներուն, այս անգամ ալ ցանկը կը գլխաւորէ «Մայքրոսոֆթ» ընկերութեան նախկին ղեկավար Պիլ Կէյթսը, որուն կարողութիւնը գնահատուած է 79.2 միլիառ տոլար:
Երկրորդ տեղը հեռահաղորդակցութեան ոլորտի գործարար, մեքսիքացի Քառլոս Սլիմ Հելուն է, որ ունի 77.1 միլիառ տոլար: Երրորդը ներդրող Ուօրէն Պաֆեթն է` 72.7 միլիառ տոլարով: Տասնեակի մէջ են սպանացի Ամանսիօ Օրթեկան, որ կը զբաղուի հագուստի արտադրութեամբ` 64.5 միլիառ տոլար կարողութեամբ, անոր, 54.3 միլիառ տոլարով կը յաջորդէ «Օրակլ»-ի ղեկավար Լարի Էլիսընը, այնուհետեւ` Չարլզ Կոխը (42.9 միլիառ): Ամենահարուստ մարդոց ցանկին մէջ կայ նաեւ հինգ հայ: Ամերիկահայ Քըրք Քըրքորեան ունի 4.2 միլիառ տոլար եւ կը զբաղեցնէ 393-րդ տեղը: Ռուսաստանի մէջ բիզնեսգործունէութիւն ծաւալող Սամուէլ Կարապետեանը 4 միլիառ տոլարով 418-րդն է, Տանիլ Խաչատուրովը 1.6 միլիառով, 1190-րդը, Սերկեյ Կալիցքին (Յարութիւնեան), 8.3 միլիառով, 162-րդ տեղը: Արժանթինահայ Էտուարտօ Էռնեկեանը 1006-րդն է` 1.9 միլիառ կարողութեամբ:
Այս տարի Forbes-ի միլիառատէրերու ցանկին մէջ ցուցանիշային` 290 նոր անուն յայտնուած է, որոնց մէջ յայտնի պասկետպոլիսէ Մայքլ Ճորտընը: Նորաթուխ միլիառատէրերու մօտ 25%ը` կամ 71 հոգի, Չինաստանէն են: 57 նոր միլիառատէր ԱՄՆ-էն են, 28-ը` Հնդկաստանէն:
Forbes այս տարի աշխարհի մէջ 1826 միլիառատէր հաշուած է, որոնք միասին ունին 7.05 թրիլիոն տոլարի կարողութիւն: Միլիառատէրերէն 46-ի տարիքը 40-էն վար է:
