Հայրենիքի մէջ իր կեցութեան ընթացքին, «ԳՈՅ» մարդասիրական հիմնադրամի ԿերամաԶարդ (Ceramazart) արուեստանոցը այցելեց մեծանուն գիտնական, հայագէտ եւ բարերար Դոկտ. Յակոբ Այնթապլեանը:
ԿերամաԶարդի արցախցի նկարիչներն ու արուեստագէտները, ծանօթանալով դոկտոր Այնթապլեանի հայրենանուէր գործունէութեանը, մեծ ոգեւորութեամբ պատրաստած էին Այնթապլեաններու ընտանիքին նուիրուած խորհրդանշանը:
Դոկտոր Այնթապլեան ծանօթացաւ տեղահանուած արցախցի արուեստագէտներուն համար բացուած ԿերամաԶարդ արուեստանոցին գործունէութեան, ուր անոնք կ՛աշխատին ու կը ստեղծագործեն, եւ իրենց հմտութիւնն ու փորձը կը փոխանցեն արցախցի փոքրիկներուն:
Կեդրոնը ունի աւելի քան 500 արցախցի երեխայ շահառուներ, որոնք կը յաճախեն կեդրոնի կողմէն կազմակերպուող անվճար կաւագործութեան եւ կաւաբուժական (therapy) դասընթացքներուն, որոնց ընթացքին երեխաներուն հետ կ՛աշխատի նաեւ որակաւորուած հոգեբան եւ արուեստաբուժութեան (art therapy) մասնագէտը:
Նշենք, որ ԿերամաԶարդը իւրօրինակ բարեգործական նախագիծ է, որ կ՛աշխատի ընկերային (social) ձեռներեցութyան ոճով՝ ծառայելու համար բռնի տեղահանուած արցախցիներուն:
Դոկտոր Այնթապլեան իր ոգեւորիչ սրտի խօսքը ուղղեց կեդրոնի աշխատակազմին՝ կարեւորելով սերունդներուն մէջ հայկական արուեստն ու մշակոյթը քարոզելու եւ տարածելու գործը:
