Գերեվարումից ու մէկուկէս տարի տեւած տանջալից հարցաքննութիւններից յետոյ, այս օրերին ընթանում է Արցախի Հանրապետութեան ռազմաքաղաքական ղեկավարների շինծու եւ կեղծ դատավարութիւնը՝ մեղադրեալների իրաւունքների կոպիտ խախտումների, ՄԱԿ-ի համապատասխան կոնվենցիաների (պայմանադրութիւններ – խմբ.) ամբողջական խախտման պայմաններում։ Նրանց հիւծուած ու տանջահար դէմքերը վկայում են ֆիզիկական ու հոգեկան խոշտանգումների, կանոնաւոր պարբերականութեամբ կրած տառապանքների մասին, իսկ Ռուբէն Վարդանեանի հացադուլը հուշում է մահուան ընդառաջ գնացողի յուսահատութիւն…
Մինչդեռ Հայաստանի իշխանութիւնները բացարձակ լուռ են, անտարբեր, նոյնիսկ՝ արհամարհական։
Հայ Ազգային Ռամկավար կուսակցութեան Հիմնադիրների Խորհուրդը չի կարող հանդուրժել այս խայտառակ կացութիւնը, որն ուղղուած է ոչ միայն Արցախի բռնադատուող ղեկավարութեան, այլեւ Հայ ժողովրդի ու Հայոց պետականութեան դէմ։
Իր զօրակցութիւնը յայտնելով Պաքուի զնդաններում պահուող հայ պատանդներին՝ Հայ Ազգային Ռամկավար կուսակցութեան Հիմնադիրների Խորհուրդը Հայաստանի իշխանութիւններից պահանջում է՝
1- Հայ պատանդների ազատման հարցը դնել Պաքուի հետ բանակցային սեղանին՝ որպէս աներկբայ նախապայման։
2- Զօրաշարժի ենթարկել դիւանագիտական իր ողջ կորպուսը (անձնակազմ – խմբ.), Հայաստանում թէ արտասահմանում՝ ի խնդիր մեր ռազմագերիների ազատ արձակման։
3- Արդարադատական պետական բոլոր մարմինների միջոցով հայցեր ներկայացնել միջազգային համապատասխան բոլոր ատեաններին՝ ազդու միջամտութեամբ անյապաղ ազատ արձակելու մեր ռազմագերիներին։
Միաժամանակ՝ Հայ Ազգային Ռամկավար կուսակցութեան Հիմնադիրների Խորհուրդը կոչ է անում համայն հայութեան բոլոր հատուածներին ու կազմակերպութիւններին՝ դուրս գալ անտարբերութեան թմբիրից եւ բողոքի, ճնշումների ու հանրայնացման բոլոր ձեւերով ու միջոցներով ձեռնարկել մեր հայրենակիցների կեանքն ու արժանապատուութիւնը օր առաջ փրկելու գործին։ Ու միշտ յիշել, որ Պաքուում ընթացող դատական գործը, ի դէմս մեր ռազմագերիների, ուղղուած է բոլորիս դէմ, մեր ժողովրդի ու մեր պետութեան դէմ։
ՀԱՅ ԱԶԳԱՅԻՆ ՌԱՄԿԱՎԱՐ ԿՈՒՍԱԿՑՈՒԹԵԱՆ ՀԻՄՆԱԴԻՐՆԵՐԻ ԽՈՐՀՈՒՐԴ
Երեւան, 3 մարտի, 2025թ.
