Մարգարէին ծննդեան տօնին առիթով, Շեմիյէ ճատրակի ակադեմիան, ճատրակի մրցաշարք մը կազմակերպեց, լիբանանեան տարբեր ակումբներ ներկայացնող 16 տարեկանէն վար 32 մարզուհիներու մասնակցութեամբ, Ռոթանա –Արժան պանդոկին մէջ, Ռաուշէ:
Մրցաշարքին առաջնութիւնը շահեցաւ ՀԵԸ-ի ճատրակի ակադեմիայի անդամ, ՀԲԸՄ-ի վարժարաններու ուսանողուհի Լիքա Ապաճեան: ՀԵԸ-ի ճատրակի ակադեմիայի մարզուհիներ Թերեզա Էսփեր եւ Լեթիսիա Մարտինի գրաւեցին պատուաբեր դիրքեր: Լեթիսիա 5-րդ դիրքը գրաւեց 12 տարեկանէն վար մրցորդներուն մէջ: Մրցաշարքին վերջաւորութեան բոլոր մասնակիցները ստացան յիշատակի մետալներ:
Նոյն օրը կայծակնային ճատրակի (Blitz chess ) խմբային մրցաշարք մը տեղի ունեցաւ Լիբանանի տասը լաւագոյն կազմերուն մասնակցութեամբ:
ՀԵԸ Անդրանիկ Անթիլիաս ապահովեց 12 կէտ եւ գրաւեց երրորդ դիրքը: Սովիետ ակումբը 15 կէտով շահեցաւ առաջնութիւնը: Անսար երկրորդ հանդիսացաւ՝ 13 կէտ:
Մրցաշարքները տեղի ունեցան ճատրակի ֆետերասիոնի փոխատենապետ եւ ՀԵԸ Անդրանիկ Անթիլիասի ճատրակի վարչութեան ատենապետ Տիգրան Զէյթճեանի հսկողութեան տակ:
Ճատրակի ծիրին մէջ մնալով, 29 Սեպտեմբեր 5 Հոկտեմբերի միջեւ, Օմանի մայրաքաղաք Մասքաթի մէջ տեղի ունեցաւ Asean Amateur chess Championship-ը: Մրցաշարքին մասնակցեցան 140 մարզիկներ: ՀԵԸ Անդրանիկ Անթիլիասը ներկայացնող 20-ամեայ Մայքըլ Ֆըրզլի 5,5 կէտ շահեցաւ հնարաւոր ինէն:
Երեսուն անդամէ աւելի հաշուող ՀԵԸ Անդրանիկ Անթիլիասի ճատրակի ակադեմիան օրըստօրէ կը շարունակէ իր վերելքը:
ՀԲԸՄ-ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ
***
Այս առիթով ԶԱՐԹՕՆՔ կը շնորհաւորէ ՀԲԸՄ-ՀԵԸ Ճատրակի Ակադեմիայի բոլոր մրցանակակիրները, ի մասնաւորի Լիքա Ապաճեանը: Լիքան ի դէպ դուստրն է Լիբանանի մէջ ՀՀ արժանաւոր հիւպատոս Լէոնարտ Ապաճեանին եւ իր կողակիցին: Երիտասարդ մարզուհիին կրկնուող պատուաբեր արդիւնքները անշուշտ արդիւնքն են բնութեան պարգեւած ձիրքին, պատկանած ակադեմիային աշխատանքին ինչպէս նաեւ իր ծնողներուն հետեւողական զոհողութեան ու քաջալերանքին:
