Ուրբաթ, 09. 12. 2022

ՀԲԸՄ-ՀԵԸ Անդրանիկ Անթիլիաս Սկաուտական  Շարժումի  Նոր Տարեշրջանի  Հանդիսաւոր Բացում

Տարեկան  բանակումէն  եւ  խարուկահանդէսէն   փայլուն յիշատակներով  բաժնուելէ  քանի մը ամիս  ետք,  ՀԵԸ Անդրանիկ  Անթիլիաս  հանդիսաւորապէս կատարեց սկաուտական նոր եղանակի բացումը:

 Շաբաթ,  22  Հոկտեմբեր  2022-ի յետմիջօրէին, հոծ բազմութիւն մը  գրաւած էր  ՀԲԸՄ-ի Տեմիրճեան կեդրոնի  բացօթեայ  մարզադաշտը, որոնց  մէջ՝  ՀԵԸ-ի  Կեդրոնական  Վարչութեան  ատենապետ եւ անդամներ, ՀԲԸՄ-ՀԵԸ  Ասպետներու  Վարչութեան ատենապետ  եւ անդամներ, Էքլերէոզ  տիւ Լիպանի   Քոմիսէր Ինթերնասիոնալ,  Էքլերէոզ  տիւ Լիպանի  քոմիսէր ժեներալ, Սքութ Տիւ  Լիպանի ներկայացուցիչներ, ՀԵԸ  Անդրանիկ  Անթիլիասի  Գործադիր Մարմինի անդամներ, ՀԵԸ Անդրանիկ Սեւանի Գործադիր  Մարմինի ատենապետ եւ անդամներ, ՀԵԸ Անդրանիկ Անթիլիասի  ծնողաց,  մայրերու եւ սաշեմի վարչութեանց, ՀԵԸ-ի զանազան  վարչութիւններու անդամ-անդամուհիներ, միութենականներ եւ ծնողներ:

Նախքան բացման   արարողութիւնը,  սկաուտական  բոլոր կազմերը, խումբ առ խումբ  վերցուցին յիշատակի նկարներ, ապա՝ խմբանկար մը:

Յաջորդաբար տեղի ունեցան խմբակային փոխանցումները.   թիթեռներէն՝  արծուիկներու եւ  գայլիկներու կարգը:  Արծուիկներէն՝ արենուշներուն, գայլիկներէն՝  սկաուտական: Սկաուտներէն՝ երէցները, արենուշներէն՝ քառավելները:

Շրջափակ  մուտք գործեց  ՀԵԸ Անդրանիկ փողերախումբը որ  քանի մը  կատարումներով խանդավառեց ներկաները:  Ապա, ՀԵԸ  Անդրանիկ  Անթիլիաս սկաուտական  բոլոր խմբաւորումները Լիբանանի, Հայաստանի, ՀԲԸՄ-ի եւ ՀԵԸ-ի դրօշներով,  տողանցելով   մուտք գործեցին  ՀԲԸՄ-ի  Տեմիրճեան կեդրոնի  շրջափակը:  Սկաուտական  իւրաքանչիւր խմբակ գրաւեց  իր  դիրքը:

Լիբանանի, Հայաստանի, ՀԲԸՄ-ի եւ ՀԵԸ-ի  քայլերգներու յոտնկայս  ունկնդրութենէն ետք,  յանուն  ՀԵԸ Անդրանիկ Անթիլիասի   երէցական կազմի անդամ, եղբայր  Կարօ Կիրիթլեան (հայերէն), քառավելական խումբի անդամ Սետրա Արթինեան (արաբերէն) բարի գալուստ մաղթեցին  ներկաներուն:

ՀԵԸ Անդրանիկ Անթիլիասի Գործադիր   Մարմինի  ներկայացուցիչ քոյր  Թալին  Ինքնատիոսեան՝ համագործակցութիւնը ամրապնդելու կոչ  ուղղեց ներկաներուն եւ  նորանոր յաջողութիւններ մաղթեց սկաուտական  բոլոր խմբաւորումներուն:

Իբրեւ պատգամաբերը  վերջերս  Երեւանի մէջ կայացած ՀԲԸՄ-ի 92-րդ  համագումարին, ՀԵԸ-ի Կեդրոնական Վարչութեան  ատենապետ  Վիգէն   Չերչեան ողջոյնի իր խօսքին մէջ  ըսաւ.«Գործնապաշտ եւ ազգաշէն  մթնոլորտի մէջ  Երեւանի մէջ տեղի ունեցաւ   ՀԲԸՄ-ի  92-րդ  համագումարը, ուր,   հայրենիքի եւ Սփիւռքի  զարգացումները  քննարկելէ ետք,  համագումարը   վերահաստատեց  միութեան եւ միասնականութեան մէջ հայութեան  փրկութիւնը տեսնելու իր պատմական կարգախօսը եւ միասնութեան հրաւիրեց  հայութեան բոլոր հատուածները»: Ատենապետը բանիւ եւ  գործով հաւաքական աշխատանքը շարունակելու  կոչ ուղղեց  բոլորին:  

Ան,  շնորհակալութիւն  յայտնեց ՀԵԸ Անդրանիկ Անթիլիաս  մասնաճիւղի  Գործադիր Մարմինի  պատասխանատու  Թալին Ինքնատիոսեանին  եւ   վարչական անդամներուն, ՀԵԸ Անդրանիկ Անթիլիասի սկաուտական խմբապետական կազմին, բոլոր խմբապետ, խմբապետուհիներուն եւ  ընդհանուր  խմբապետ  եղբայր  Եղիկ Աւետիքեանին, ինչպէս նաեւ ծնողաց   վարչութեան  եւ բոլոր անոնց, որոնք  մնայուն կը  քաջալերեն  մեր բոլոր   միջոցառումները:

ՀԵԸ Անդրանիկ   Անթիլիաս սկաուտական  շարժումի ընդհանուր խմբապետ եղբայր Եղիկ Աւետիքեան դիտել տուաւ, թէ սկաուտական  բոլոր  միաւորները  դանդաղ բայց հաստատ քայլերով նոր յաջողութիւններ կ’արձանագրեն:

 Էքլերէոզ տիւ Լիպանի   Քոմիսէր Ինթերնասիոնալ՝ Լենա  Գարակէօզեան- Իւրնեշլեան  բացատրեց  սկաուտական նոր  տարեշրջանի գործունէութեան կարգախօսը:   

  Յաջորդաբար  փոխանցուեցան  Սքութ  տիւ  Լիպանի եւ AEL-ի սրտի խօսքերը:    

   Հասած  էր ընդհանուր խմբապետական,  խմբապետական եւ փոխխմբապետական փոխանցումներուն պահը:

Բացման  հանդիսութիւնը   աւարտեցաւ ծնողաց  վարչութեան պատրաստած կոկիկ հիւրասարութեամբ:

 ՀԲԸՄ-ՀԵԸ-ի ՄԱՄԼՈՅ ԵՒ  ՏԵՂԵԿԱՏՈՒԱԿԱՆ ԳՐԱՍԵՆԵԱԿ

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին