Կիրակի, 27 Օգոստոս 2022-ին, Լիբանանի ճատրակի ֆետերասիոնին հովանաւորութեամբ, Տէր էլ Հարֆ ակումբին կազմակերպութեամբ, Ճատրակի միջազգային ֆետերասիոնին կողմէ ճանաչում վայելող մրցաշարք մը տեղի ունեցաւ տեղւոյն կեդրոնին մէջ:
Մրցաշարքը բաժնուած էր երեք կարգերու. բաց՝ բոլոր տարիքներու համար, 10 եւ 8 տարեկանէն փոքրեր:
ՀԵԸ Անդրանիկ Անթիլիաս ճատրակի դպրոցը (ակադեմիա) ութ մարզիկներով մասնակցեցաւ մրցաշարքին եւ նուաճեց երկու մետալ:
Ուշագրաւ էր չորսամեայ տաղանդաւոր փոքրիկ ՝ Սարգիս Զէյթճեանի մասնակցութիւնը ութ տարեկանէն փոքրերու մրցաշարքին: Ան, չորս կէտ ապահովեց առաւելագոյն վեցէն եւ երկրորդ հանդիսացաւ, շահելով արծաթ մետալ: Իսկ Քրիսթոս Ֆրեմ՝ 10 տարեկանէն փոքրերու մէջ երրորդ հանդիսացաւ՝ պրոնզ մետալ:
Սարգիս Զէյթճեան երեք մրցաշարքերու մասնակցած է ընթացիկ տարուան մէջ: Բոլորէն ալ մետալ ապահոված է ՀԵԸ Անդրանիկ Անթիլիասին:
Ջերմօրէն կը շնորհաւորենք ՀԵԸ Անդրանիկ Անթիլիասի ճատրակի ակադեմիային արձանագրած յաջողութիւնը եւ նորանոր յաղթանակներ կը սպասենք փոքրիկն Սարգիս Զէյթճեանէն:
