Կոչերը կը շարունակուին Լիբանանի կառավարութեան շուտափոյթ կազմութեան օրակարգով:
Վերջինը կը հանդիսանայ Հըզպալլայի առաջնորդ Հասան Նասրալլայինը, որ դարձեալ շեշտը դրաւ կառավարութեան կազմութեան առաջնահերթութեան վրայ:
Նշենք, որ Հըզպալլան ալ յստակ կեցուածքով մը Վարչապետ Նաժիպ Միքաթիին վստահած էր կառավարութեան կազմութիւնը:
Այս պահուս նմանօրինակ կոչերու միատեղ հնչեցումը պարզ կը դարձնէ, որ կողմերը համաձայն են լիիրաւ կառավարութիւն մը ունենալ շուտով հակակշռելու եւ պատասխանատուութիւն ստանձնելու յառաջիկայ 31 Հոկտեմբերէն ետք նախագահական աթոռին թափուր մնալու հաւանականութեան պարագային: