Մինչ լիբանանեան քաղաքական բոլոր կողմերը մխրճուած են ընտրական պատրաստութիւններու մէջ, նշելով որ ընտրական ցանկերու ամբողջացումի վերջնաժամկէտը Ապրիլի 4ն է, Հըզպալլա կը շարունակէ տարածաշրջանային իր միջամտութիւնները:
Հըզպալլան համարած է, որ «Ալ Խուտայր»ի գործողութիւնը կը հաստատէ «պաղեստինցի ժողովուրդին հաստատակամութիւնը եւ անոր կամքը` դիմակայելու բռնագրաւման՝ բոլոր առկայ հնարաւորութիւններով եւ գործիքներով», եւ որ այս գործողութիւնը «պաղեստինեան անկախ եւ դիմադրող որոշման գործընթացն է»:
Երէկ հրապարակած յայտարարութեան մէջ Հըզպալլան համարած է, որ «գործողութիւնը ամենակարեւոր եւ ամենաարդիւնաւէտ գործնական պատասխանն է բնականոնացման տխրահռչակ եւ դաւաճանական հանդիպումներուն, որ արաբական որոշ վարչակարգեր կը կատարեն թշնամիին հետ», ընդգծելով, որ «կարգաւորման հանդիպումները անկարեւոր եւ անարդիւնաւէտ են, քանի որ իրական որոշումը պաղեստինեան ժողովուրդին որոշումն է»:
Ան մատնանշեց, որ «պաղեստինցի ժողովուրդը ամէն օր կը հաստատէ, որ այս յանցագործ թշնամիին հետ հաշտեցման եւ բնականոնացման տեղ չկայ», եւ որ իրենք կը գտնուին «սրող հերոսական առճակատման մէջ մինչեւ յաղթանակ եւ ամբողջական ազատագրում»:
Նշենք, որ Հայֆայէն դէպի հարաւ գտնուող Հերպերթ Սամուէլ փողոցին մէջ երկու հոգիի կողմէ իրականացուած հրաձգութեան հետեւանքով սպաննուած է երկու իսրայէլցի, իսկ կան վիրաւորներ, որոնցմէ շատերը ծանր վիճակի մէջ են:
Ըստ լրատուամիջոցներուն` «Ալ Խուտայր»ի սոյն գործողութեան հեղինակները Ում ալ Ֆահմի 48-րդ շրջանի պաղեստինցիներն են»:
