Շաբաթ, 01. 10. 2022

Ակամայ Ընդմիջումէ Ետք՝ ՀԲԸՄ- ՀԵԸ, Աւելի Քան 200 Վարչականներու Մասնակցութեամբ Գումարեց Տարեկան Ընդհանուր Վարչական Ժողովը

Երկու  տարուան ակամայ   ընդմիջումէ ետք, ՀԲԸՄ-ՀԵԸ-ի  մեծ ընտանիքը,   ՀԵԸ-ի Կեդրոնական Վարչութեան կազմակերպութեամբ, Կիրակի,  5  Դեկտեմբեր 2021-ի առաւօտեան,  ՀԲԸՄ-ի Տեմիրճեան  կեդրոնին մէջ  գումարեց  տարեկան  ընդհանուր վարչական   ժողովը:

Ի ներկայութիւն,  ՀԲԸՄ-ի  Լիբանանի Շրջանակային Յանձնաժողովի ներկայացուցիչներու,  ՀԵԸ-ի Կեդրոնական Վարչութեան անդամներու, ՀԵԸ-ի   38 վարչութիւններ ներկայացնող աւելի   քան   երկու  հարիւր վարչականներու,   Լիբանանի,  Հայաստանի,  ՀԲԸՄ-ի եւ ՀԵԸ-ի  քայլերգներուն  յոտնկայս  ունկնդրութենէն  ետք,   ՀԵԸ-ի Կեդրոնական Վարչութեան ատենապետ Վիգէն Չերչեան բարի  գալուստ   մաղթելով բացուած  յայտարարեց    տարեկան  ընդհանուր վարչական  ժողովը եւ   ներկաները  հրաւիրեց  մէկ վայրկեան յոտնկայս յարգելու  վերջին  երկու տարիներուն  ընթացքին առ յաւէտ բաժնուած  միութենականներուն յիշատակը:

Բացման խօսքին մէջ  ՀԵԸ-ի Կեդրոնական Վարչութեան ատենապետ Վիգէն Չերչեան յատուկ  շնորհակալութիւն  յայտնեց  ՀԲԸՄ-ի Լիբանանի Շրջանակային Յանձնաժողովի անդամներուն, յատկապէս՝ ատենապետ  տիար Ժերար Թիւֆէնքճեանին, որ  մնայուն կերպով նիւթապէս եւ բարոյապէս սատար կը կենայ ՀԵԸ-ի  գործունէութիւններուն: Ան   նաեւ շնորհակալութիւն յայտնեց տիար Երջօ  Սամուէլեանին, որ նիւթապէս  կը  քաջալերէ ՀԵԸ-ի   աշխատանքները:  Վիգէն Չերչեան  շնորհակալութեան խօսք  յղեց  ՀԵԸ-ի Կեդրոնական Վարչութեան անդամներուն,  ՀԵԸ-ի կառոյցներու վարչական  կազմերուն,  ՀԵԸ-ի  գրասենեակի պաշտօնէութեան,  ՀԲԸՄ-ի Տեմիրճեան  կեդրոնի  եւ  ՀԲԸՄ-ի  Նազարեան- Մովսէսեան  կեդրոնի վարչութիւններուն, որոնք  հակառակ Լիբանանի  տնտեսական, ընկերային  ծանր պայմաններուն,  «քորոնա» ժահրին հետեւանքով   յայտարարուած   ստիպողական  վիճակին, յաջողած  են  վառ  պահել    միութենական գործունէութիւնը:    

 ՀԵԸ-ի ատենապետը  նշեց, թէ բնականոն կեանքը վերջին ամիսներուն աստիճանաբար  վերադարձած ըլլալով,   ՀԵԸ-ի կազմերը   մեծ նուաճումներ արձանագրած են  պասքեթպոլի,  ֆութպոլի,  մինի ֆութպոլի,  ճատրակ, թենիսի, թեքուանտոյի  եւ  փինկ փոնկի մարզերուն  մէջ:  Ան նաեւ   դիտել տուաւ, որ   2022-ը  յոբելենական  տարի պիտի դառնայ   ՀԵԸ-ի   համար: Հանդիսաւորապէս պիտի նշուին  ՀԵԸ-ի հիմնադրութեան  90-ամեակը,  ՀԵԸ-ի սկաուտական  շարժումի  հիմնադրութեան  85, ՀԵԸ Անդրանիկ Անթիլիասի՝ 50,   ՀԵԸ Անդրանիկ Սեւանի՝  60-ամեակները:

 Վիգէն Չերչեան յատուկ  շնորհակալութիւն յայտնեց   Նազարեան   ընտանիքին, որուն իշխանական նուիրատուութեամբ՝  Նազարեան շէնքի երկու յարկեր  վերանորոգուած են գերարդիական պայմաններով եւ տրամադրուած  ՀԵԸ Անդրանիկ Սեւան սկաուտական  շարժումին:    

ՀԵԸ-ի  մամլոյ եւ  տեղեկատուական գրասենեակի  տնօրէն  Ահարոն Շխրտըմեան ընթերցեց   2019  թուականի   տարեկան վարչական ժողովին ատենագրութիւնը:

ՀԲԸՄ-ի   Լիբանանի վարիչ տնօրէնուհի   Արին  Ղազարեան  ընթերցեց   ՀԲԸՄ-ի  Լիբանանի  Շրջանակային  Յանձնաժողովի  ատենապետ  տիար Ժերար Թիւֆէնքճեանի սրտի խօսքը:

Վարչութիւնները  հերթաբար   ներկայացուցին անցնող երկու տարիներու իրենց  գործունէութեան  տեղեկագիրը:  Ելոյթներուն  զուգահեռ  մեծ պաստառի վրայ  ցուցադրուեցաւ  անոնց գործունէութիւնը խտացնող  տեսերիզները:  Վարչութիւնները  միաժամանակ ներկայացուցին յառաջիկայ տարուան   իրենց   ծրագիրները:

Մարզական շարժումին մէջ արձանագրած  յաջողութիւններուն  առիթով,  ՀԵԸ-ի  Կեդրոնական Վարչութիւնը պարգեւատրեց  Թոնի Ճունթոյեանը՝  պասքեթպոլ,  Սահակ Պիտինեանը՝  փինկ փոնկ,  Վահէ Հաքիմեանը՝ ֆութպոլ:

   Զեկոյցներու աւարտին,  ՀԵԸ-ի ատենապետը  շեշտեց, որ  Կեդրոնական  Վարչութիւնը նիւթապէս եւ բարոյապէս  պիտի   սատարէ   մասնաճիւղերուն  գործունէութիւնը:

 Տարեկան   ընդհանուր վարչական   ժողովը  աւարտեցաւ  ՀԵԸ-ի ատենապետին   հաւաքական   ճիգերով աշխատանքը շարունակելու պատգամով:  

Ժողովականները սրահէն դուրս գալէ առաջ յիշատակի խմբանկարով մը յաւերժացուցին տարեկան ընդհանուր  վարչական  ժողովը:

Հաղորդագրութիւնը՝
ՀԵԸ-Ի ՄԱՄԼՈՅ  ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ-էն
Նախորդ յօդուածըԶԱՐԹՕՆՔ 04.12.2021
Յաջորդ յօդուածը«Զարթօնք» Հայրենիքի Մէջ -68-

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին