Ուրբաթ, 29. 03. 2024

spot_img

Ամենայն Հայոց Կաթողիկոսը Հայրապետական Այցով Մեկնեցաւ Սիւնիք եւ Արցախի Հանրապետութիւն

Յունիսի 3-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը հայրապետական քառօրեայ այցով մեկնեց Սիւնիքի մարզ եւ Արցախի Հանրապետութիւն։ Այցի ընթացքում Նորին Սրբութեանն ուղեկցում են յատուկ յանձնարարութիւններով հայրապետական նուիրակ Տ․ Պարգեւ արքեպիսկոպոս Մարտիրոսեանը, Մայր Աթոռի դիւանապետ Տ․ Արշակ եպիսկոպոս Խաչատրեանը, Մայր Աթոռի վանական խորհրդի ատենապետ եւ լուսարարապետ Տ․ Մուշեղ եպիսկոպոս Բաբայեանը, Գէորգեան հոգեւոր ճեմարանի տեսուչ Տ․ Մեսրոպ վարդապետ Պարսամեանը, Արցախի հոգեւոր-մշակութային ժառանգութեան պահպանման հարցերով գրասենեակի տնօրէն Տ․ Գարեգին վարդապետ Համբարձումեանը, ՀՀ ԶՈՒ Հոգեւոր առաջնորդ Տ․ Մովսէս վարդապետ Սարգսեանը եւ Մայր Աթոռի Տեղեկատուական համակարգի տնօրէն Տ․ Վահրամ աւագ քահանայ Մելիքեանը։

Վեհափառ Հայրապետի հետ Արցախ մեկնեց նաեւ Հայկական Բարեգործական Ընդհանուր Միութեան նախագահ տիար Պերճ Սեդրակեանը։

Ամենայն Հայոց Կաթողիկոսի գլխաւորած պատուիրակութեանը Գորիսի «Զանգեր» յուշարձանի մօտ դիմաւորեցին Սիւնեաց թեմի առաջնորդական տեղապահ Տ․ Մակար վարդապետ Յակոբեանը թեմի հոգեւոր դասի հետ միասին, Գորիսի համայնքապետ Առուշան Առուշանեանը, Սիսիանի համայնքապետ Արթուր Սարգսեանը, Քաջարանի համայնքապետ Մանուէլ Փարամազեանը, զինուորականներ եւ Գորիսի համայնքայիններ։

Աւանդական աղուհացի արարողութիւնից յետոյ Ամենայն Հայոց Կաթողիկոսն իր գնահատանքն ու օրհնութիւնը բերեց քաղաքային իշխանութիւնների ներկայացուցիչներին եւ հաւաքուած ժողովրդին։

Այնուհետեւ Ամենայն Հայոց Կաթողիկոսը ՀԲԸՄ նախագահի եւ հոգեւոր դասի հետ միասին մեկնեց Գորիսի Սուրբ Գրիգոր Լուսաւորիչ առաջնորդանիստ եկեղեցի, որտեղ Հայոց Հայրապետին դիմաւորեցին Գորիսի բնակիչներ եւ զինուորներ։ «Հրաշափառ» շարականի երգեցողութեան ներքոյ Վեհափառ Հայրապետը, իր օրհնութիւնը բաշխելով հաւատաւոր ժողովրդին, մուտք գործեց տաճար, ուր սաղմոսերգութիւնից եւ աղօթքից յետոյ կատարուեց Հանրապետական մաղթանք Հայաստանի եւ Արցախի անսասանութեան, Սիւնեաց աշխարհի եւ նրա ժողովրդի անվտանգ, խաղաղ  ու բարօր կեանքի համար։

Արարողութեան աւարտին Ամենայն Հայոց Կաթողիկոսն իր պատգամն ուղղեց ներկայ ժողովրդին։ «Սիրելի սիւնեցի հաւատաւոր զաւակներ Մեր, այցելել ենք ձեզ յետպատերազմեան դժուարին իրավիճակի, դառը հարուածների եւ նեղութիւններիդիմագրաւման այս ժամանակահատուածում։ Եկել ենք ի մօտոյ հաղորդ լինելու ձեր մտահոգութիւններին ու խնդիրներին, նաեւ Հայրապետական Մեր գնահատանքն ու օրհնութիւնը վերստին բերելու ձեզ։

․․․Մենք քաջատեղեակ ենք ազգային-հայրենական մեր կեանքի այս վճռորոշ շրջանում ձեզ պատած դժուարութիւնների, ձեր առջեւ ծառացած մարտահրաւէրների մասին։ Արցախեան վերջին պատերազմում մեր թանկագին զաւակները նահատակուեցին, ունեցանք վիրաւորներ, անյայտ կորածներ, գերեվարուածներ, տասնեակ հազարաւոր տեղահանուած խաղաղ բնակիչներ։ Տարածքային կորուստների պատճառով նաեւ Սիւնեաց աշխարհի բնակավայրեր սահմանամերձ դարձան Ատրպէյճանի հետ՝ դրանից բխող խիստ մտահոգիչ հետեւանքներով։ Ադրբեջանը սանձարձակ ոտնձգութիւններ է կատարում նաեւ Հայաստանի սահմանների նկատմամբ, մասնաւորապէս Սիւնիքի, Գեղարքունիքի գիւղական որոշ համայնքների տարածքների հանդէպ», – ասաց Հայրապետը։

«Սիրելիներ, խռովքի մէջ է ամէնքիս հոգին, խռովքի մէջ է համայն հայութիւնը։ Սիւնեաց աշխարհի Մեր զաւակներիդ ստեղծագործ ու խաղաղ կեանքի բնականոն ընթացքն է խաթարուած, աւելին՝ ապահովութեան ու անվտանգութեան լրջագոյն խնդիրն է յառնած։ Սակայն Մենք գիտենք, որ ձեր ոգին անկոտրում է, ձեր հարազատ հողին կապուածութիւնը, հայրենասիրութիւնն ու ազգանուիրումը ամուր են ձեր սրտերում ու հոգիներում։ Դուք ձեր պապերից ու հայրերից ժառանգել էք քաջութիւն ու կորով՝ օրհասական հանգամանքներում ձեր հայրենի տունն ու օջախը պաշտպանելու, անսասան լինելու հայրենեաց պաշտպանութեան դիրքերում եւ արիաբար կանգուն մնալու հարազատ հողին։ Այս փորձութիւնը եւս, քաջարի սիւնեցիներ, ազգովի կը յաղթահարենք՝ միայն թէ, մեր հերոս նախնիների ոգեշունչ պատգամի համաձայն, մեր արիութեան ու քաջութեան մէջ վախկոտութիւն չխառնենք, ամուր պահենք մեր նուիրումը հայրենիքին ու մեր սրբազան արժէքներին։ Հաստատուն մնանք հաւատի մէջ, անկոտրում՝ նեղութիւնների ու դժուարութիւնների առջեւ։ Ամուր պահենք միմեանց հանդէպ քրիստոսապատուէր սէրն ու հզօր միասնութիւնը, որի առջեւ նահանջում են փորձութիւնները եւ զօրանում ու ամրապնդւում է լաւատեսութեան ոգին», – ասաց Նորին Սրբութիւնը՝ յաւելելով, որ Հայոց Եկեղեցին եւ եկեղեցականները հանապազօրեայ իրենց աղօթքով ու ծառայութեամբ սիւնեցիների կողքին են՝  Աստծոյ խօսքով զօրացնելու, դժուարութիւնների ու փորձութիւնների մէջ Տիրոջ օգնութեան խոստումը փոխանցելու, նրանց խիզախութիւնն ամուր պահելու։

Վեհափառ Հայրապետը տեղեկացրեց, որ Հայոց Եկեղեցին թէ՛ պատերազմի ընթացքում եւ թէ՛ յետպատերազմեան օրերին իր ձայնն է բարձրացրել միջազգային, միջեկեղեցական, միջկրօնական ատեաններումԱրցախի եւ Հայաստանիդէմ իրականացուող ոտնձգութիւնները խստօրէն դատապարտելու կոչով, գերիների ազատ արձակման համար հրատապ աշխատանքներ իրականացնելու յորդորով եւ ի պաշտպանութիւն Արցախի մեր ժողովրդի ազատ ու անկախ կեանքի արդար իրաւունքի։

Այցի առիթով Նորին Սրբութիւնն իր գնահատանքն ու օրհնութիւնը բերեց Սիւնիքի մարզային իշխանութիւններին, համայնքապետերին, որոնք եւ այսօր, ինչպէս պատերազմական դժուարին օրերին, համայնքների բնակիչների հետ ամուր կանգնած են հայրենիքի պաշտպանութեան դիրքերում։ Հայրապետական գնահատանք եւ օրհնութիւն փոխանցուեց նաեւ Սիւնեաց թեմի հոգեւոր սպասաւորներին՝ առաջնորդական տեղապահի գլխաւորութեամբ, հաւատաւոր մեր ժողովրդի հաւատն ու ոգին ամուր պահելու, Աստծոյ խօսքով հաւատաւոր իրենց հոտին զօրացնելու ու մխիթարելու, սահմանամերձ դարձած բնակավայրերում արիասիրտ ծառայութիւնը շարունակելու համար։

Վերջում Հայոց Հայրապետը հայցեց, որ Բարձրեալ Տէրը օգնական ու զօրակից լինի ամէնքին՝ մեր ժողովրդի իրաւունքների պաշտպանութեան գործում ճշմարտութիւնը ճանաչելի դարձնելու եւ արդարութեան հասնելու ջանքերը արդիւնաւորելու։ Նորին Սրբութիւնը նաեւ աղօթեց, որԱստուածխաղաղ ու անվրդով պահի հայրենի մեր երկիրը, եւ Տիրոջ պահապան Սուրբ Աջի առջեւ նահանջեն բոլոր չարիքներն ու փորձանքները մեր կեանքից։

Արարողութիւնից յետոյ հայրապետական պատուիրակութիւնը համայնքապետերի ուղեկցութեամբ այցելեց Գորիսի զինուորական պանթէոն, ուր Ամենայն Հայոց Կաթողիկոսը եւ ՀԲԸՄ նախագահ Պերճ Սեդրակեանը ծաղկեպսակներ զետեղեցին անմար կրակի եւ յիշատակի խաչքարի առջեւ, ապա Արցախեան երկրորդ պատերազմում զոհուած քաջորդիների շիրիմների առջեւ Նորին Սրբութեան գլխաւորութեամբ հոգեւոր դասը աղօթեց նրանց հոգիների հանգստութեան համար։

Նոյն օրը Ամենայն Հայոց Կաթողիկոսը պատուիրակութեամբ այցելեց Շուռնուխի սահմանամերձ համայնք, ուր Հայոց Հայրապետին դիմաւորեցին համայնքի ղեկավար Յակոբ Արշակեանը եւ համայնքի բնակիչները։ 

Փոխանցելով ժողովրդին իր հայրական սերն ու Մայր Աթոռ Սուրբ Էջմիածնի օրհնութիւնը՝ Նորին Սրբութիւնն իր զօրակցութիւնը բերեց շուռնուխցիներին։ Վեհափառը նշեց, որ սիւնեցիները ազգային-ազատագրական պայքարում իրենց աննկուն ու անպարտ ոգու շնորհիւ դարերի մէջ քաջերի համբաւ են վաստակել եւ մեր օրերում եւս սահմանին սիւնեաց քաջերի ինքնակազմակերպուած խմբերի դրսեւորած արիութիւնն ու հայրենի հողը պաշտպանելու հարցում սկզբունքայնութիւնը եւս այդ ոգու անուրանալի արտայայտութիւնն են։

Ամենայն Հայոց Կաթողիկոսը եւ ՀԲԸՄ նախագահը բնակիչների հետ զրուցեցին տիրող անհանգստութիւնների ու առկայ խնդիրների, կեանքի բնականոն ընթացքի խաթարման եւ վտանգների մասին։

Իր զրոյցում Նորին Սրբութիւնը հաւաստիացրեց, որ Հայոց Եկեղեցին պիտի շարունակի ջանքեր գործադրել բարձրաձայնելու սահմանամերձ համայնքներում բնակուող մեր ժողովրդի խնդիրները եւ հետամուտ լինելու իրաւունքների պաշտպանութեանը, ապա յորդորեց նախնեաց օրինակով ամուր եւ աննահանջ մնալ իրենց հաւատի եւ յոյսի մէջ՝ կառչած հայրենի հողին, իրենց օջախներին։

Ամենայն Հայոց Կաթողիկոսն այցելեց նաեւ շուռնուխցիների տներ, զրուցեց ընտանիքների հետ, ծանօթացաւ առկայ դժուարութիւններին։

Նորին Սրբութիւնը նաեւ իր օրհնութիւններն ու բարեմաղթանքները բերեց շուռնուխցի նորապսակ մի զոյգի, որ տեղեկանալով Հայոց Հայրապետի այցի մասին, մասնաւոր ցանկութիւն էր յայտնել արժանանալու հայրապետական օրհնութեան։

Վերադարձին Ամենայն Հայոց Կաթողիկոսը զրոյց ունեցաւ համայնքապետերի հետ, որոնց թւում էր նաեւ Կապանի համայնքապետ Գէորգ Փարսեանը։ 

Երեկոյեան Հայոց Հովուապետը հանդիպում ունեցաւ Սիւնեաց թեմի հոգեւոր դասի հետ՝ եկեղեցականներին վերստին բերելով իր հայրական օրհնութիւնն ու գնահատանքը իրենց նուիրեալ ծառայութեան համար։

Հանդիպմանը քննարկուեցին յետպատերազմեան շրջանում՝ առկայ դժուարին իրավիճակում, Եկեղեցու կողմից ձեռնարկուող քայլերի, իրականացուող սոցիալական, հոգեխնամ ծրագրերին։

Նորին Սրբութիւնը թեմի հոգեւոր սպասաւորների ուշադրութիւնը մասնաւորապէս հրաւիրեց զոհուածների, անյայտ կորածների եւ գերութեան մէջ գտնուողների ընտանիքներին, վիրաւորներին եւ նրանց հոգեւոր խնամքին։

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին