«ԶԱՐԹՕՆՔ», ՊԷՅՐՈՒԹ –ՀՀ վարչապետ Նիկոլ Փաշինեան տիկնոջ՝ Աննա Յակոբեանի հետ Սինկափուրի Հանրապետութեան վարչապետ Լի Սիեն Լոնկի հրաւէրով Յուլիս 7–ին պաշտօնական այցով մեկնած է Սինկափուր։
Այս մասին կը տեղեկացնէ «Արմէնփրես»`վկայակոչելով ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութիւնը, Հայաստանի վարչապետը եւ տիկին Աննա Յակոբեանը այցելած են Սինկափուրի հայկական Սուրբ Գրիգոր Լուսաւորիչ եկեղեցի, որ Սինկափուրի ամենահին քրիստոնէական կառոյցն է (1835 թ.)։ ՀՀ վարչապետի, Սինկափուրի առեւտուրի եւ արդիւնաբերութեան աւագ պետական նախարար եւ Սինկափուրի, ինչպէս նաեւ հարեւան երկիրներու ու տարածաշրջաններու՝ Մալեզիայի, Ինտոնեզիոյ, Թայիլանտի, Հոնկ Քոնկի, Աւստրալիոյ հայ համայնքներու ներկայացուցիչներու մասնակցութեամբ Սուրբ Գրիգոր Լուսաւորիչ եկեղեցւոյ յարակից հայկական փողոցի նորաբաց այգիին մէջ տեղի ունեցաւ «Վանտա Միսս Ճոակիմ» խոլորձի արձանի բացման հանդիսաւոր արարողութիւնը։ Արձանը կառուցուած է բարերար Խաժակ Մանուկեանի նախաձեռնութեամբ:
«Վանտա Միսս Ճոակիմ» անունը կրող խոլորձ տեսակը, որ յայտնի է նաեւ որպէս Սինկափուրեան կամ Ալոհա արքայադստեր խոլորձ, խառնածին տեսակ է, որ դարձած է Սինկափուրի ազգային ծաղիկ` պետական խորհրդանիշ։ Յայտնի խոլորձը իր անուանումը ստացած է` ի պատիւ Սինկափուրի մէջ բնակող հայ ծաղկաբոյծ Ագնէս Ճոակիմի (Աշխէն Յովակիմեան), ով ծաղիկը յայտնաբերած է Եղէգնուտի մէջ:
Նիկոլ Փաշինեան եւ Աննա Յակոբեան այցելած են Սուրբ Գրիգոր Լուսաւորիչ եկեղեցի, շրջայց կատարած հայկական ժառանգութեան թանգարանին մէջ: Վարչապետը գրառում կատարած է պատուաւոր հիւրերու գիրքին մէջ, ապա հանդիպած վերը նշուած պետութիւններու հայ համայնքներու ներկայացուցիչներուն հետ:
Ի յիշատակ Հայոց ցեղասպանութեան զոհերուն` վարչապետը ծակեպսակ դրած է Յիշողութեան պարտէզին մէջ կանգնեցուած հայկական խաչքարի մօտ: Պարտէզին մէջ ամփոփուած են նաեւ բազմաթիւ հայկական տապանաքարեր:
Նիկոլ Փաշինեան եւ Աննա Յակոբեան շրջած են նաեւ Սինկափուրի Արմէնիա հայկական փողոցի մէջ:
