«ԶԱՐԹՕՆՔ», ՊԷՅՐՈՒԹ-Ի տես Մուսթաքպալ շարժումի եւ Ազգային ազատ հոսանք կուսակցութիւններուն միջեւ ծայր առած լարուած իրավիճակին՝ Լիբանանի Հանրապետութեան վարչապետ Սաատ Հարիրի հաւաստեց, որ քաղաքական առկայ տարաձայնութիւններն ու բախումները որեւէ բացասական անդրադարձ պիտի չունենան նախագահ Միշէլ Աունի հետ յարաբերութիւններուն վրայ:
Մեծ Սերայլի մէջ մամլոյ ֆետրասիոնէն պատուիրակութեան մը հետ հանդիպումին վարչապետ Հարիրի ըսաւ, որ ինք այստեղ կը գտնուի «բացառապէս աշխատելու նպատակով»՝ ի հեճուկս ժամանակ առ ժամանակ ծայր առնող լարուածութիւններու:
Այնուհետեւ վարչապետ Հարիրի անդրադարձաւ այն քաղաքական թէժ գոյավիճակի կարգաւորումին, որ ուղի հարթեց Աունի՝ Հոկտեմբեր 2016-ի ընտրութեան եւ նոյն տարուան Դեկտեմբերին իր՝ որպէս վարչապետի վերանշանակումին:
«Չնայած երկրին մէջ քաղաքական ակնբախ տարակարծութիւններուն՝ նախագահ Աունի հետ հաղորդակցութիւնը անխափան կը շարունակուի»,- եզրափակեց Հարիրի: