Հինգշաբթի, 25. 07. 2024

spot_img

Ռուբէն Հերեան մեծանուն որբախոյզին կեանքին ու գործունէութիւններուն նուիրուած ձեռնարկ

ԹՄՄ Մեծագոյն Լոս Անճելըսի մասնաճիւղ

ՆՈՐ ՕՐ, ԼՈՍ ԱՆՃԵԼԸՍ.- Կիրակի, 17 Փետրուար 2019-ի յետմիջօրէի ժամը 5։00-ին, Քալիֆորնիոյ Ալթատինա քաղաքի «Պէշկէօթիւրեան» կեդրոնի հանդիսասրահին մէջ տեղի ունեցաւ հայ ազգի հերոսներէն՝ Ռուբէն Հերեանին նուիրուած մեծարանքի միջոցառում մը:

Հայ ազգի պատմութեան մէջ միայն պատերազմիկներն ու ֆետայիները չեն որոնք դարձած են յիշարժան: Հայութիւնը ունեցած է նաեւ փրկարար նուիրեալներ, որոնցմէ շատերը, իրենց ճոխ ու փարթամ կեանքի ապրելակերպը զոհած են յանուն ազգին փրկութեան աշխատանքներուն, իրենց լումաներով եւ ֆիզիքապէս, շատ յաճախ իրենց կեանքը վտանգի ենթարկելով:

Ռուբէն Հերեան այդ նուիրեալ ազգայիններէն մին էր, որ կորուստէ փրկեց հազարաւոր հայ որբերու կեանքը Հայոց Ցեղասպանութեան ժամանակաշրջանին, 1916 թուականէն մինչեւ 1921 թուականը, անցնելով երկրէ երկիր, քաղաքէ քաղաք եւ գիւղէ գիւղ, փնտռելու ամէն մէկ վրանի կամ հիւղի մէջ թաքնուած հայու բեկորներ, զանոնք փրկելու դիւցազնագոյն ջանքերով: Իսկ այսպիսի հերոսներ կը մնան անմոռաց սերունդներէ սերունդ, որպէս կեանքի փրկարար:

ԹՄՄ-ի Մեծագոյն Լոս Անճելըսի մասնաճիւղը կազմակերպած էր սոյն գնահատելի ձեռնարկը, որ նուիրուած էր Ռուբէն Հերեանի կեանքին եւ ազգային փրկարար աշխատանքին: Հանդիսավար, վարչութեան ատենապետ Քարլ Պարտաքեան բարի գալստեան խօսքերէ ետք հրաւիրեց Հայաստանի հիւպատոսարանի ներկայացուցիչ Քանա Յովհաննիսեանը, որ հիւպատոսարանին կողմէ ներկայացուց ողջոյնի իր խօսքը: Օրուան գլխաւոր բանախօսն էր Արամ Արքուն, գործադիր վարիչ ԹՄՄ ԱՄՆ-ի եւ Քանատայի եւ օգնական խմբագիրը անգլիատառ «Տը Միրըր Սթեքթէյթըր» շաբաթաթերթին: Մշակութասէր ներկաներ վայելեցին Պրն. Արքունի պատմական սահիկներով օժտուած ներկայացումը, որոնցմէ քանիներուն ծնողներուն կեանքը փրկուած էր մեծանուն որբահաւաքին կողմէ:

Հանդիսութիւնը աւարտեցաւ «Փաթիլ» պարախումբին սիրունիկ երեխաներու գեղեցիկ ելոյթով, որուն յաջորդեց պատշաճ հիւրասիրութիւն:

Աշխատանքնիդ արդար գնահատանքի արժանի, ԹՄՄ Մեծագոյն Լոս Անճելըսի վարչութիւն. ձեզի կը մաղթենք յարատեւութիւն եւ կորով:

ԹՂԹԱԿԻՑ

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին