«ԶԱՐԹՕՆՔ», ՊԷՅՐՈՒԹ – Սարգիս Մելիքսեթեան (5 Սեպտեմբեր 1899, Գանձակ – 3 Նոյեմբեր 1980, Երեւան), հայ թատերագէտ, գրականագէտ, ՀՍՍՀ արուեստի վաստակաւոր գործիչ (1956), ԽՍՀՄ գրողներու միութեան անդամ (1934)։
Ծնած է Գանձակ քաղաքը: Աւարտած է Թիֆլիսի Ներսիսեան դպրոցը։ Լրագրական գործունէութիւնը սկսած է 1921ին Թիֆլիսի մէջ։ Յետոյ փոխադրուած է Երեւան, երկու տարի աշխատած է Ժողովրդական կոմիսարներու խորհուրդին մէջ որպէս գիտելիքներու բաժնի վարիչ, իսկ 1923-25ին՝ «Խորհրդային Հայաստան» թերթի խմբագրութեանեան բաժնի վարիչ։ 1925-30ին՝ արհեստակցական միութեան նախագահ, 1930-35ին՝ «Հայկինո»յի սցենարական բաժնի վարիչ, ապա նախագահ-խմբագիրի տեղակալ։ Հետագային աշխատած է որպէս խաղացանկային կոմիտէի նախագահ, արուեստի գործերու վարչութեան թատերական բաժնի վարիչ, 1935-49ին՝ Հայաստանի թատերական թանգարանի խմբագիր, 1938-42ին՝ արուեստի գործերու վարչութեան թատերգութեան բաժնի գլխաւոր խորհրդատու։
1944-47ին եղած է Երեւանի թատերական հիմնարկի թատերագիտական բաժնի ղեկավարը, 1947-49ին՝ ամպիոնի վարիչ նոյն հիմնարկին մէջ։ 1950-54ին աշխատած է ՀՍՍՀ ԳԱ արուեստի մէջ որպէս աւագ գիտաշխատող։ 1954-63ին գրականութեան եւ արուեստի թանգարանի արուեստի բաժնի գիտնական քարտուղարն էր։ 1963-80ին եղած է Եղիշէ Չարենցի անուան գրականութեան եւ արուեստի թանգարանի խմբագիրը։ 1954ին «Յովհաննէս Աբելեան» թեմայով պաշտպանած է եւ ստացած արուեստագիտութեան թեկնածուի աստիճան։ 1971ին «Սովետական թատրոնի պատմութիւնը» թեմայով պաշտպանած է եւ ստացած է արուեստագիտութեան դոկտորի աստիճան։ Ռուսերէն լոյս տեսած է իր «Մեր թատրոնի ուղին» (Երեւան, 1940) գիրքը։ Պարգեւատրուած է աշխատանքային կարմիր դրօշի շքանշանով։ Մահացած է 1980ին:
