Հինգշաբթի, 25. 07. 2024

spot_img

Գիւղատնտեսութեան Աշխատողի Օրը .Արցախեան Բերքի Փառատօնը Պէտք Է Գոնէ Մէկ Անգամ Սեփական Աչքով Տեսնել

ՔՐԻՍԹԻՆԱ ԱՂԱԼԱՐԵԱՆ

«Զարթօնք»ի Երեւանի Աշխատակից

Արցախի Հանրապետութեան մէջ ամէն տարի Հոկտեմբեր ամսուան երկրորդ Կիրակին կը նշուի որպէս Գիւղատնտեսութեան կամ գիւղատնտեսի օր, որուն ժամանակ կը կազմակերպուի բերքի ցուցահանդէս-տօնավաճառ: Ամէնամեայ փառատօնը կը կազմակերպուի ԱՀ տնտեսութեան նախարարութեան ջանքերով եւ նպատակն է Արցախը աւելի ճանաչելի դարձնել աշխարհին, գրաւել զբօսաշրջիկներու ուշադրութիւնը ու վերջ ի վերջոյ հնարաւորինս օգնել գիւղացիներուն, որպէսզի կարենան վաճառել իրենց արտադրանքը, զորս շատ մը պարագաներու կը մշակեն հակառակորդի կրակոցներուն ներքոյ:

Ստեփանակերտի Վերածնունդի հրապարակին մէջ աւելի քան 700 տաղաւար յատկացուած է գիւղացիներուն, գործարարներուն, Արցախի տարբեր շրջաններու ներկայացուցիչներուն իրենց անարատ ու տնտեսապէս մաքուր ապրանքը ցուցադրելու եւ վաճառելու համար: Ստեփանակերտի կեդրոնական հատուածը մէկ օր առաջ կը փակուի, կը նախապատաստուին մեծ միջոցառումին, պէտք է զայն պատուով կատարել: Վերածնունդի հրապարակին մէջ ամբողջ օրը մարդոց հոսքը չի դադրիր:

Տօնին տաղաւարներով կը շրջի նաեւ Արցախի նախագահ Բակօ Սահակեանը, պաշտպանութեան բանակի հրամանատար Լեւոն Մնացականեանը եւ այլք:

Հայրենասիրական երաժշտութեամբ, հայկական խորովածի հոտով, արցախեան աւանդական կուրկուտի համով կը գրաւուի ոեւէ զբօսաշրջիկ: Ի դէպ, կուրկուտը Արցախի մէջ կը պատաստեն տարբեր ձեւով, այսինքն՝ ամէն մէկը պատրաստելու իր գաղտնիքը ունի: Կուրկուտի պատրաստութեան համար անհրաժեշտ է տաւարի կամ սագի միս՝ ըստ ցանկութեան ու ճաշակի, ինչպէս նաեւ ըստ բնակավայրի, ցորեն, ջուր եւ աղ. անմահական համը կ’երաշխաւորուի: Արցախի մէջ աւանդոյթ կայ՝ հարսանիքներու ժամանակ փեսայի ընկերներուն, նախքան հարսի տունը երթալը, կուրկուտ կը հիւրասիրեն: Ինչ խօսք, Արցախը աւանդոյթներով հարուստ երկիր է:

Վերադառնալով բերքի փառատօնին՝ նշենք, որ հազարաւոր մարդիկ այդ օրը յատուկ կ’այցելեն Արցախ՝ մասնակցելու փառատօնին, գնելու Արցախի բերքն ու բարիքը, յուշանուէրներ, համտեսելու ժենգիալով հաց եւ այլն:

Տաղաւարներէն իւրաքանչիւրը աւելի գրաւիչ դարձնելու համար անիկա կը զարդարուի մշակութային աւանդական արժէքներ ստեղծող զարդարանքներով: Տօնավաճառին կարելի է գտնել նոյնիսկ այնպիսի իրեր, որոնք կրնան մանկութիւնը յիշեցնել: Ցուցահանդէս-վաճառքի ընթացքին կարելի է համտեսել պատրաստի ուտեստներ՝ խորոված, խաշլամա, կուրկուտ, վայելել արցախեան գինին ու մշակութային համոյթներու կատարումները:

Ցուցահանդէս-տօնավաճառի մասնակից գիւղացիները կը նշէին, որ տարուէ-տարի տօնը աւելի մեծ շուքով կը նշեն, տաղաւարներու թիւը կ’աւելնայ: Ճիշդ է, կը պատահի, որ բերքը առատ չէ, ներկայացնելու, վաճառելու շատ բան չկայ, սակայն ատիկա չի խանգարեր, որ մասնակցին փառատօնին: Գիւղացիները կը կարեւորեն նման ցուցահանդէս-վաճառքներու կազմակերպումը: Կ’ըսեն, որ դուրսէն եկող մարդիկ կ’ուզեն անարատ արտադրանք գնել, իսկ զբօսաշրջիկներուն համար նոյնիսկ զարմանալի կը թուի նման պատկեր տեսնելը:

Փառատօնի ժամանակ Արցախի աւանդական ժենգիալով հաց համտեսել փափաքողներու թիւը նոյնպէս, սովորաբար, մեծ  կ’ըլլայ: Արցախցի կինը կը յաջողէր պատուէրները ժամանակին պատրաստել, որպէսզի բոլորը գոհ մնային նոյնիսկ սպասարկումէն: Մեր աչքէն չվրիպեցաւ արցախցի Ծովիկ տատիկը, որ գնումներ կատարած էր ու ծանր-ծանր տոպրակներով կը մօտենար վերջնակէտին՝ ձուկի տաղաւարին, ուր զինքը բաւական ջերմ ընդունեցին ու ճանապարհեցին:

 

Հայաստանի Հանրապետութեան նախագահ Արմէն Սարգսեաննալ անցնող Կիրակին անցուցած էր Արցախի մէջ մասնակցելուհամար Ստեփանակերտի Վերածնունդի հրապարակին վրայ տեղի ունեցող Գիւղատնտեսութեան աշխատողի օրուան նուիրուած «Բերքի տօն» տօնավաճառին:

 

Արցախեան բերքի փառատօնը պէտք է գոնէ մէկ անգամ սեփական աչքով տեսնել:

 

տեսերիզը դիտել սեղմելով հետեւեալ կապին վրայ՝

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին