«ԶԱՐԹՕՆՔ», ՊԷՅՐՈՒԹ: Թուրքիոյ արտաքին գործոց նախարար Մեւլութ Չաւուշօղլուն եւ ԱՄՆ-ի պետական քարտուղար Մայքլ Փոմփէօն Օգոստոս 3-ին բանակցութիւններ վարած են Սինկափորի մէջ եւ պայմանաւորուած են Անգարայի եւ Ուաշինկթընի միջեւ շարունակել երկխօսութիւնը` վերջինիս կողմէ Թուրքիոյ երկու նախարարներուն նկատմամբ պատժամիջոցներու սահմանումէն ետք:
Այդ մասին, ինչպէս կը փոխանցէ «Արմէնփրես»-ը, յայտնած է «Sabah» թերթը: Իր տուեալներով՝ Հարաւ-արեւելեան Ասիոյ պետութիւններու ընկերակցութեան համաժողովի ծիրէն ներս կայացած հանդիպումը տեւած է 40 վայրկեան: Բացի այդ՝ հրատարակութիւնը կը նշէ, որ վերջին 15 օրուան ընթացքին Չաւուշօղլուն եւ Փոմփէօն արդէն չորս հեռախօսազրոյց ունեցած են, հաղորդած է «ՏԱՍՍ»-ը:
