ՀՀ վարչապետ Նիկոլ Փաշինեան ընդունած է Հայաստանի մէջ Ռուսաստանի նորանշանակ արտակարգ եւ լիազօր դեսպան Սերկէյ Քոփիրքինը:
Ինչպէս կը փոխանցէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ վարչապետը շնորհաւորած է դեսպանին պատասխանատու պաշտօնին նշանակուելու կապակցութեամբ եւ վստահութիւն յայտնած, որ ՀՀ կառավարութեան հետ համագործակցութեան արդիւնքով հայ-ռուսական յարաբերութիւնները կը շարունակեն զարգանալ ու ամրապնդուիլ: Նիկոլ Փաշինեան ընդգծած է, որ Հայաստանի եւ Ռուսաստանի միջեւ բարեկամական ու դաշնակցային յարաբերութիւններուն մէջ նոր փուլ սկսած է եւ ընդգծած է, որ ՀՀ կառավարութիւնը հետամուտ է զարգացնելու փոխգործակցութիւնը բոլոր ոլորտներուն մէջ: Գործադիրի ղեկավարը կարեւորած է արդիւնաւէտ համագործակցութիւնը նաեւ Եւրասիական տնտեսական միութեան ու Հաւաքական անվտանգութեան պայմանագիրի կազմակերպութեան շրջանակին մէջ՝ առկայ խնդիրներու լուծման, համախմբման գործընթացներու արդիւնաւէտութեան բարձրացման նպատակով:
Սերկէյ Քոփիրքինը վստահեցուցած է, որ բոլոր ջանքերը կը ներդնէ եղբայրական եւ բարեկամական երկու պետութիւններու համագործակցութեան նոր զարկ տալու համար: Դեսպանը նշած է, որ, հաշուի առնելով հայ-ռուսական պատմական յարաբերութիւններն ու ծաւալները, մեծ պատասխանատուութիւն կը զգայ նոր պաշտօնին վրայ եւ պատրաստ է ՀՀ կառավարութեան հետ աշխուժօրէն համագործակցելու՝ ի նպաստ երկու պետութիւններու կապերու աւելի խորացման:
Հանդիպումին ընթացքին զրուցակիցները քննարկած են հայ-ռուսական յարաբերութիւններու օրակարգային շարք մը հարցեր:
