Յունիսի 1-ին, հրաւէրով Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսի, Հայաստանի Հանրապետութեան վարչապետ Նիկոլ Փաշինեանն այցելեց Մայր Աթոռ Սուրբ Էջմիածին, ուր «Վաչէ եւ Թամար Մանուկեան» մատենադարանում հանդիպեց Գերագոյն հոգեւոր խորհրդի անդամների, հայաստանեան թեմերի առաջնորդների եւ Մայր Աթոռում պաշտօնավարող եպիսկոպոսների հետ:
Նորին Սրբութիւնը, ողջունելով ՀՀ վարչապետի այցը Մայր Աթոռ Սուրբ Էջմիածին, շնորհաւորեց եւ իր օրհնութիւնը փոխանցեց նրան ծննդեան տարեդարձի կապակցութեամբ` մաղթելով Աստծոյ օգնականութիւնը:
Ապա Վեհափառ Հայրապետը ՀՀ վարչապետին ներկայացրեց Գերագոյն հոգեւոր խորհրդի անդամներին եւ ներկայ հոգեւորականներին, տեղեկութիւններ փոխանցեց ԳՀԽ գործունէութեան եւ ժողովի օրակարգում ընդգրկուող ազգային-եկեղեցական կեանքը յուզող զանազան խնդիրների մասին:
Գարեգին Բ. Կաթողիկոսը ՀՀ վարչապետի հետ հանդիպումը պատշաճ առիթ նկատեց հոգեւոր դասի համար` ծանօթանալու ապագայի վերաբերեալ նրա տեսլականին եւ լուսաբանութիւններ ստանալու մեր ժողովրդին յուզող տարբեր խնդիրների վերաբերեալ:
Անդրադառնալով վերջին շրջանի ներհայաստանեան քաղաքական իրադարձութիւններին՝ Վեհափառ Հայրապետը գոհունակութեամբ արձանագրեց, որ դրանք հանգուցալուծուեցին խաղաղ գործընթացներով: Ամենայն Հայոց Կաթողիկոսը հայցեց Երկնաւորից, որպէսզի Տէրը զօրացնի հայ ժողովրդին` կերտելու խաղաղ եւ բարօր հայրենիք, ապրելու ստեղծագործ ու երջանիկ կեանքով:
Ամենայն Հայոց Հայրապետը հանդիպմանն ընթացքում ՀՀ վարչապետին յաջողութիւններ մաղթեց իր պատասխանատու պաշտօնում:
Այնուհետեւ ներկաներին ողջունեց ՀՀ վարչապետ Նիկոլ Փաշինեանը՝ ուրախութիւն յայտնելով հանդիպման հնարաւորութեան համար: ՀՀ վարչապետը, խօսելով Հայաստանում սիրոյ եւ համերաշխութեան կարգախօսի ներքոյ տեղի ունեցած փոփոխութիւնների մասին, կարեւորեց ամէնքի ջանքերի մէկտեղումը, որպէսզի ձեւաւորուած այդ մթնոլորտը լինի մշտական իրողութիւն Հայաստանի Հանրապետութիւնում եւ ընդհանրապէս հայ ժողովրդի մէջ: Պրն. Նիկոլ Փաշինեանը կարեւորեց ստեղծարար մթնոլորտի ձեւաւորումը, որը կը նպաստի անվտանգութեան եւ բարեկեցութեան մակարդակի բարձրացմանը եւ ազգային միասնութեան ամրապնդմանը:
Վարչապետ Փաշինեանն անդրադարձ կատարեց նաեւ Հայոց Եկեղեցու կարեւոր առաքելութեանը եւ ազգային կեանքում անուրանալի դերակատարութեանը, խօսեց Եկեղեցի-պետութիւն յարաբերութիւնների ու գործակցութեան մասին: ՀՀ վարչապետը ներկայացրեց Վրաստան կատարած իր պաշտօնական այցի արդիւնքները, պատասխանեց նաեւ եկեղեցականների հարցերին, որոնք վերաբերում էին ներհայաստանեան կեանքի զարգացումներին, ղարաբաղեան հակամարտութեան կարգաւորմանը, հայրենի պետութեան արտաքին քաղաքականութեանը եւ Սփիւռքին:
Ամփոփելով հանդիպումը` Ամենայն Հայոց Կաթողիկոսը վերստին իր բարեմաղթանքներն ուղղեց ՀՀ վարչապետին` ընդգծելով, որ անկախ պետականութիւնը Հայոց Եկեղեցու դարերով փայփայած երազն է եղել, եւ հայրենիքի զօրացումը պիտի շարունակի մնալ Եկեղեցու մշտական առաքելութիւնը:
